Tags-Mausam

ik shāḳh-e-rañg haat se mausam ke chhuT ga.ī
ḳhālī badan ragoñ meñ koī loTne lagā

mausam-e-ḳhanda-e-gul hai to zabāñ band rakkheñ
baat apnī bhī hañsī meñ na uḌā dī jaa.e

be-samar be-rañg mausam barf kī sūrat safed
aur dil umDe hue rañgoñ kī tuġhyānī meñ hai

pattharoñ meñ bhī ka.ī pech paḌe haiñ 'shāhid'
un pe bhī mausam-e-shādāb utārā jaa.e

tārīk raat mausam-e-barsāt jān-e-zār
girdāb pīchhe sāmne tūfāñ havā kā thā

koī bhī rut ho milī hai dukhoñ kī fasl hameñ
jo mausam aayā hai us ke itaab dekhe haiñ

zāhir meñ the pur-tapāk lamhe
mausam thā vo rishte TūTne kā

rañg mausam kā harā thā pahle
peḌ ye kitnā ghanā thā pahle

maiñ ne logoñ ko bhī mausam kā muqallid paayā
baat hotī hī nahīñ haath badal jaate haiñ

jis māhaul ke tapte mausam dukh hī dete the 'in.ām'
us par bhī sāvan barsāyā bhuul huī sharminda huuñ

ai ḳhāk-e-vatan tujh se maiñ sharminda bahut huuñ
mahñgā.ī ke mausam meñ ye tyauhār paḌā hai

firāq mausam kī chilmanoñ se visāl lamhe chamak uTheñge
udaas shāmoñ meñ kāġhaz-e-dil pe guzre vaqtoñ ke baab likhnā

āhanī azm hoñ par aañkh bhī nam hai merī
bhīge mausam meñ mujhe zañg se Dar lagtā hai

tum ne sunā
mausam ne sabze kī zabānī kyā kahā?

kyuuñ ḳhushk ho gayā shajr-e-ārzū 'salīm'
mausam thā jabki ziist kā saffāk bhī nahīñ

kah gayā maiñ sāmne us ke jo dil kā mudda.ā
kuchh to mausam bhī ajab thā kuchh mirī himmat bhī thī

sunā thā maiñ ne yahī din haiñ phuul khilne ke
mire liye to ye mausam ḳharāb hai maulā

aaj ke daur kā mausam hai ġhubār-ālūda
aa.ine par koī tahrīr bichhāte kyuuñ ho

mujhe tum mere mausam hī meñ paḌhnā
nisāb-e-nasl-e-ā.inda nahīñ huuñ

piirī meñ kyā javānī ke mausam ko roiye
ab sub.h hone aa.ī hai ik dam to soiye