Tags-Mausam

arsa-e-umr meñ kyā kyā na ruteñ aa.iiñ magar
koī Thahrī na yahāñ dard ke mausam kī tarah

maiñ garm-o-sard ko taqdīr samjhe baiThā rahā
nizām-e-mausam-e-hastī chalā rahī thī havā

vo ḳhvāb thā yā safar aane vaale mausam kā
marī paḌī thī zamīñ zahr khā rahī thī havā

manzar manzar jī lo jitnā jī paao
mausam pal pal rañg badaltā rahtā hai

jis dam qafas meñ mausam-e-gul kī ḳhabar ga.ī
ik baar qaidiyoñ pe qayāmat guzar ga.ī

girā na aañkh se aañsū fareb-e-qismat par
sukūn jis se ho vo iztirāb paidā kar

nit-na.e rañg badalte hue lamhoñ se nikal
zindagī kyā hai ye mausam kī zabānī bhī to sun

avval-e-ishq kī saa.at jā kar phir nahīñ aa.ī
phir koī mausam pahle mausam sā nahīñ dekhā

mausam-e-hijr ho yā vasl kī vo raat hasīñ
'sīmā' dhaḌkā sā lagā rahtā hai Dhal jaane kā

terā va.ada hai sabab dil ke bahal jaane kā
mausam hijr meñ har phuul ke khil jaane kā

ga.e mausam meñ maiñ ne kyuuñ na kaaTī fasl ḳhvāboñ kī
maiñ ab jaagī huuñ jab phal kho chuke haiñ zā.iqa apnā

udaas baam pe mausam ne khol diiñ zulfeñ
kisī biyog meñ jogan hai kyā kiyā jaa.e

ġhunche kyuuñ ḳhāmosh aa.e gulshan-e-hastī meñ 'shauq'
mausam-e-gul se magar ḳhauf-e-ḳhizāñ ham-dosh thā

mausam ke sard-o-garm ishāre se kaT gayā
zaḳhmī vajūd vaqt ke dhāre se kaT gayā

hamārī zaat ke yuuñ to
sabhī mausam badalte haiñ

kal nashāt-e-qurb se mausam bahār-andāza thā
kuchh havā bhī narm thī kuchh rañg-e-gul bhī taaza thā

vo zamāne kā taġhayyur ho ki mausam kā mizāj
be-zarar donoñ haiñ nairañgi-e-ādām ke sivā

gulshan-e-zīst meñ mausam kā badalnā kyā hai
kaash ruk jaa.e koī dard ke mausam ke sivā

ki raas aatā nahīñ āñkhoñ ko ab sho.aloñ kā mausam
havāoñ is taraf bhī lā ke bādal chhoḌ jaanā

maan mausam kā kahā chhā.ī ghaTā jaam uThā
aag se aag bujhā phuul khilā jaam uThā