Tags-Mausam

aane to do bahār kā mausam junūñ ke din
apne liye ham aap hī nashtar banā.eñge

badalte mausam kī silvaToñ meñ dabī haiñ hijrat kī dāstāneñ
vo dāstāneñ jo sunñe vāloñ kī niiñd kab kī uḌā chukī haiñ

hamārī āñkhoñ meñ jalne vaale nuqūsh baaqī haiñ
kaan mausam kī garm aahaT se chauñk uThte haiñ

kis kaḌe vaqt meñ mausam ne gavāhī māñgī
jab garebān hī apnā hai na dāman apnā

kal mausam kī hathelī par
naam tirā khudvā.ūñgā

koī mausam ho dil-gulistāñ meñ
aarzū ke gulāb taaza haiñ

mausam-e-dil jo kabhī zard sā hone lag jaa.e
apnā dil ḳhuun karo phuul ugāne lag jaao

guzartā hī nahīñ mausam judā.ī ke dayāroñ kā
milan-rut ke kināroñ se havā vāpas palaT aa.e

havā bahār ke mausam meñ yuuñ chalī ki 'na.īm'
na surḳh-rū thā gulistāñ na surḳh-rū the gulāb

kisī ke haath meñ patthar kahāñ vo sahn meñ peḌ
hamāre ahd se mausam shajar hajar ke ga.e

hai barg-o-bār kā girnā to qarz mausam kā
havā-e-tund parinde kahāñ shajar ke ga.e

mausam ke chehre kī shikneñ kahtī haiñ
āñhkeñ hoñgī yā phir manzar zaḳhmī hogā

jaatā rahā nigāh se juuñ mausam-e-bahār
aaj us baġhair dāġh-e-jigar haiñ siyāh-posh

raat ajab āseb-zada sā mausam thā
apnā honā aur na honā mub.ham thā

Thahar jaa.e dar o dīvār par jab tīsrā mausam
nahīñ kuchh farq paḌtā phir ḳhizāoñ se bahāroñ se

hazār dard ke mausam guzar ga.e lekin
kabhī darāz na dast-e-savāl ham ne kiyā

ga.ī jo tiflī to phir ālam-e-shabāb aayā
gayā shabāb to ab mausam-e-ḳhizāb aayā

ye bhīgā bhīgā sā mausam
ye titlī phuul aur shabnam

koī mausam ho mirī ḳhushbū rahe is phuul meñ
dāstāñ merī kahī yā an-kahī jaisī bhī hai

visāl-e-mausam
tumhāre abrū ke ik ishāre kā muntazir hai