Tags-Mausam

zarūrī to nahīñ ik fasl-e-gul ho
junūñ ke aur bhī mausam bahut haiñ

kis havāle se thā mausam kā sitam peḌoñ par
duur tak phail ga.ī zard tabāhī kaise

uTThe haath duāoñ vaale bhar de maulā
mere shahr kā mausam achchhā kar de maulā

yaas ke mausam meñ us kī dil-lagī achchhī lagī
aañkh nam ho kar bhī hoñToñ par hañsī achchhī lagī

kitne mausam sargardāñ the mujh se haath milāne meñ
maiñ ne shāyad der lagā dī ḳhud se bāhar aane meñ

har hasīñ chehre pe jam kar rah ga.ī mausam kī gard
har hasīñ chehra mire albam kā dhundlā rah gayā

mausam-e-gul hai bādal chhā.e khanak rahe haiñ paimāne
kaisī tauba, tauba tauba, tauba nazr-e-jām karo

hamāre saath kuchh guzre hue mausam bhī shāmil haiñ
tamāshā-gāh-e-ālam tujh ko ibrat-nāk karne meñ

sabz mausam kī rifāqat us kā kārobār hai
peḌ kab sūkhe hue pattoñ kā hisse-dār hai

bahār aane kī ummīd ke ḳhumār meñ thā
ḳhizāñ ke daur meñ bhī mausam-e-bahār meñ thā

mausam-e-gul kunj-e-gulshan nik.hat-e-gesū na ho
ab yahī ḳhvāhish hai taskīñ kā koī pahlū na ho

diloñ par qahr kā mausam hai kaisā
mirī bastī duā par chal rahī hai

jis se khiltā hai bayābāñ meñ guloñ kā mausam
husn-e-jānāñ meñ vo tahrīk nazar aatī hai

duur ho kar mujh se chaltī hai havā-e-jāñ-fazā
jī rahā huuñ phir bhī aise mausam-e-jāñkāh meñ

na ab ke mausam-e-gul kā bhī inkishāf huā
diye jalā ke ye āñkheñ bujhā gayā hai kaun

koī mausam ho magar shān-e-ḳham-o-pech vahī
raat kī tarah koī zulf sañvāre nikle

kabhī qarīb kabhī duur ho ke rote haiñ
mohabbatoñ ke bhī mausam ajiib hote haiñ

kaliyoñ kī qabā.eñ chaak huiiñ phūloñ ke chehre zaḳhmī haiñ
ab ke ye bahāroñ kā mausam kyā rañg nayā dikhlā.e hai

ḳhizāñ kī fasl ho roze ke ayyām-e-mubārak hoñ
tabī.at lahr par aa.ī to be-mausam bhī piite haiñ

tum bin ye bahāroñ kā mausam lagtā hai mujhe patjhaḌ kī tarah
tum saath raho to har ik rut mere liye sāvan hotī hai