Tags-Mausam

barg-e-māsūm se karte haiñ ḳhizāñ kī bāteñ
mausam-e-sabz ke lamhāt bhī shātir kyā haiñ

mausam phir tabdīl huā hai tez havā hai
galī se us kī aaj guzarnā haule haule

kisī mausam kī vo bāteñ jo terī yaad kartā huuñ
unhīñ bātoñ ko phir phir kah dil apnā shaad kartā huuñ

ik alag tahzīb hai tanhā.iyoñ ke shahr kī
ek hī aalam hamesha aur koī mausam nahīñ

ik mausam hare parindoñ kā vo sard havā kā rizq huā
ik gulshan ḳhālī peḌoñ kā aur ham sab us meñ rahte haiñ

mausam-e-gul sirf yādoñ meñ hai ab
umr guzrī ham ḳhizāñ tak aa ga.e

ghar kī chhat par rim-jhim bārish jaltī dhuup
ye mausam bhī aa jaatā hai ba.az auqāt

achchhī qismat achchhā mausam achchhe log
phir bhī dil ghabrā jaatā hai ba.az auqāt

hamāre pahle hī mausam ne ham ko toḌ diyā
magar tumhāre badan meñ lachak bahut hai abhī

ye kal kisī na.e mausam kī fasl kāTeñge
saroñ meñ ahl-e-junūñ ke Thanak bahut hai abhī

ummīdoñ par barf kā mausam aa jā.egā
dīvāroñ par diip aur āñkheñ rah jā.eñgī

giraftār-e-vafā rone kā koī ek mausam rakh
jo naala roz bah nikle vo barsātī nahīñ hotā

muhtāj nahīñ hai kisht-e-jāñ mausam ke badalte dhāroñ kī
kuchh daaġh to dil meñ be-mausam sau phuul khilā.e rakhte haiñ

fazā-e-dil pe taarī hai bahut hī habs kā mausam
tirī qurbat kī ḳhushbū kā vo jhoñkā yaad aatā hai

visāl-rut kī ye pahlī dastak hī sarzanish hai
ki hijr-mausam ne raste raste safar kā āġhāz kar diyā hai

mire andar ke mausam hī mujhe tāmīr karte haiñ
kabhī sairāb hotā huuñ kabhī sahrā-numā huuñ maiñ

ittifāqan mil gayā to pūchh lo mausam kā haal
kyuuñ nahīñ miltā vo us se pūchhnā achchhā nahīñ

mausam-e-ġham guzar na jaa.e kahīñ
shab meñ sūraj nikal na aa.e kahīñ

rihā kartā nahīñ sayyād ham ko mausam-e-gul meñ
qafas meñ dam jo ghabrātā hai sar de de paTakte haiñ