Tags-Mazi

jo uTThe samt-e-māzī vo nazar merā nahīñ hāsil
pas-e-dīvār-e-mustaqbil jo dekhe vo nazar denā

ab chalo dekh leñ yahī kar ke
apne maazī pe shā.irī kar ke

mere maazī kī band muTThī meñ
terī yādoñ ke chand sikke haiñ

hasrat-e-dil nā-mukammal hai kitāb-e-zindagī
joḌ de maazī ke sab aurāq mustaqbil ke saath

ka.ī nā-āshnā chehre hijāboñ se nikal aa.e
na.e kirdār maazī kī kitāboñ se nikal aa.e

hamīñ pe gir paḌī kal raat vo dīvār ro ro kar
ki jis pe apne maazī kī kahānī likh rahe the ham

ye bhī mumkin hai ki tum haath jalā lo apnā
merī maazī kī kabhī raakh kuredā na karo

tahzīb-e-nau kī raushnī meñ jal-bujhe tamām
maazī kī yādgār mire ilm aur funūn

tere maazī ke saath dafn kahīñ
merā ik vāqi.a nahīñ maiñ huuñ

band kar de koī maazī kā darīcha mujh par
ab is ā.īne meñ sūrat nahīñ dekhī jaatī

merā maazī mujh se bichhaḌ kar kyā jaane kis haal meñ hai
merī tarah vo bhī tanhā ho ye bhī to ho saktā hai

hijr-zada ik āshiq mahv-e-ġham akasr
maazī ke aurāq palaTtā rahtā hai

zehn meñ maazī jab bhī ghūmne lagtā hai
aañkh meñ kitne aañsū aane lagte haiñ

koī to kaaT batā mujh ko tū mire maazī
ki ab ke vaar tirī aan baan shaan pe hai

dāvat-e-ām hai us jaan ke dushman ko mujhe
talḳhiyāñ maazī kī is baar bhulā kar le jaa.e

jab bhī chāhūñ ki baḌhūñ aage to maazī kī ye mauj
le ke jaatī hai mujhe aur bahā ke pīchhe

agarche isrār-e-be-ḳhudī hai tujhe bhī zar-posh mahfiloñ meñ
mujhe bhī zid hai ki tere dil meñ nuqūsh-e-māzī ubhār aa.uuñ

vo un kī dil-fareb dil-ārā.iyāñ kahāñ
maazī ke ḳhauf-zār meñ ab kho rahā hai kyuuñ

kuredtā hai bahut raakh mere maazī kī
maiñ chuuk jā.ūñ to vo uñgliyāñ jalā legā

ye bhī ik shart hai takmīl-e-hikāyat ke liye
hāl-o-mustaqbil-o-māzī ko milā kar dekheñ