Tags-Mazi

mere bhī to maazī kī bahut sī haiñ kitābeñ
par un ko palaTne kī to fursat bhī nahīñ hai

ḳhud ko maazī meñ rakhūñ haal meñ rahte hue bhī
na.e vaqtoñ ke ḳhayālāt na likhne pā.ūñ

sham.a kī lau par jalte dekhā raat jo ik parvāne ko
saarī kahānī maazī kī vo apnī zabānī yaad aa.ī

maazī kī āñkhoñ meñ jhāñk ke dekhūñ to
kuchh chehre har baar ulajhne lagte haiñ

apne maazī ke ghane jañgal se
kaun niklegā! kahāñ niklegā

kab talak gā.egā 'māhir' azmat-e-māzī ke giit
asr-e-nau kī roz-afzūñ garmī-e-bāzār dekh

maazī o haal kī tafrīq vo qurbat ye firāq
pyaar gulshan se chalā aayā hai zindānoñ meñ

jab ḳhayāloñ meñ tire jism ko chhū letā huuñ
zindagī sho.ala-e-māzī se jhulas jaatī hai

aap be-kār mirī baat pe jhunjhlāte haiñ
kaun kahtā hai ki maazī ko burā kahtā huuñ

maazī ke ḳharāboñ meñ bhī kahīñ lau detā rahā sūraj apnā
maazī ke ḳharāboñ meñ bhī ham ik ḳhvāb-e-jahān-fardā the

sirf vīrāna hī ġhamgīnī kā baa.is to nahīñ
ahd-e-māzī kī vo tasvīr bhī ho saktī hai

sab log tere shahr ke māzī-parast the
mushkil se haal meñ unheñ laanā paḌā mujhe

yād-e-māzī ġham-e-imroz umīd-e-fardā
kitne saa.e mire hamrāh chalā karte haiñ

maazī ke reg-zār pe rakhnā sambhal ke paañv
bachchoñ kā is meñ koī gharauñdā banā na ho

har Tiile kī oT se lākhoñ vahshī āñkheñ chamkeñgī
maazī kī har pagDanDī par nezoñ meñ ghir jāoge

is qadar aurāq-e-māzī par chaḌhā gard-o-ġhubār
shāyad ab in kī jagah bahte hue paanī meñ hai

zindagī ko ahd-e-māzī kī rivāyat jaan kar
saf.ha-e-daurāñ se tahrīreñ miTā dete haiñ ham

par mire dost ye haal to maazī se bhī bad-tar hai
is meñ nafrat ke ubāle haiñ bahut

vo haal kā nahīñ maazī kā koī qissa thā
jab apne-āp meñ maiñ TuuT kar bikhartā thā

maiñ mahal ret ke sahrā meñ banāne baiThā
chand alfāz ko maazī ke bhulāne baiThā