Tags-Mazi

kitāb-e-māzī ke aurāq ulaT ke dekh zarā
na jaane kaun sā saf.ha muḌā huā nikle

maiñ vo qatra ki jis meñ samundar kī betābiyāñ maujzan haiñ
vo lamha jo mustaqbil-o-hāl-o-māzī kā aa.ina hai

thī har ik taḳhrīb ke parde meñ ik ta.amīr dekh
ġhaur se maazī meñ apne haal kī tasvīr dekh

apne maazī ko charāġhoñ meñ basar ham ne kiyā
kaT ga.ī raat to dīdār-e-sahar ham ne kiyā

zehn par 'chāñd' phir ik barq sī lahrāne lagī
dil ne maazī ke nihāñ-ḳhānoñ se kyā māñgā thā

sadī sadī ke ujāloñ se baat hotī hai
tire ḳhayāl ke maazī meñ kyuuñ na kho jaa.eñ

ham hijr kī kaalī rātoñ meñ jab bistar-e-ḳhvāb pe jaate haiñ
maazī ke tamām masā.ib ik ik kar ke sāmne aate haiñ

ummīd-e-vafā ke pesh-e-nazar maiñ un kī jafā.eñ bhuul gayā
hai mustaqbil par aañkh mirī maazī ko bhulātā jaatā huuñ

jo din tirī yaad meñ kaTe the
maazī ke khañDar bane khaḌe haiñ

chhin ga.ī mujh se har ik chiiz alif se yā tak
mere maazī ne ye likkhī thī vasiyyat kaisī

bharā jā.egā kab tak ḳhūn-e-māzī nabz-e-fardā meñ
ab is pahlū pe nazm-e-qalb-e-getī aa nahīñ saktā

hañsī meñ kaTtī thiiñ rāteñ ḳhushī meñ din guzartā thā
'kañval' maazī kā afsāna na tum bhūle na ham bhūle

vaqt tezāb kī mānind jhulas de na kahīñ
apne ḳhākistar-e-māzī meñ dabā do mujh ko

maiñ huuñ vo lamha jo muTThī meñ samā saktā nahīñ
pal meñ huuñ imroz-o-māzī pal meñ ā.inda huuñ maiñ

kuchh bāteñ kuchh rāteñ kuchh barsāteñ apnā sarmāya
maazī ke andhiyāre meñ ye jalte diip hamāre haiñ

jis ko dekho ehtisāb-e-zīst se ġhāfil hai aaj
ranj-e-māzī hai na fikr-e-hāl-o-mustaqbil hai aaj

ye lagtā hai us ik pal meñ ki maiñ aur tū nahīñ haiñ do
vo pal jis meñ mujhe maazī hī mustaqbil sā lagtā hai

vo shām-e-ġham jo guzārī ham ne koī guzāre to jaan paa.e
kaThin hai kitnā hai kaisā mushkil uThā ke maazī meñ haal rakhnā

kuredtā hai bahut raakh mere maazī kī
maiñ chuuk jā.ūñ to vo uñgliyāñ jalā legā

ham apnā daur-e-māzī bhūlte jaate haiñ ai 'shārib'
qayāmat hai haqīqat bhī kahānī hotī jaatī hai