Tags-Mazi

mujh ko samajh rahā thā jo maazī kī ik kitāb
vo bhī na.e nisāb meñ shāmil nahīñ rahā

suqrāt kyā masīh kyā zikr-e-husain kyā
maazī sunā rahā hai mirī dāstāñ mujhe

haal behāl hai tārīk hai mustaqbil bhī
ban paḌe tum se to maazī mirā lā do mujh ko

is tarah dard kā tum apne mudāvā karnā
yād-e-māzī ko charāġh-e-rah-e-fardā karnā

maazī kī turbat se nikal aatī hai kisī kī yaad kī laash
merī soch mirī dushman hai roz musībat Dāltī hai

zamāne kā asar hotā nahīñ hai haal par apne
ki yaksāñ hālat-e-māzī-o-mustaqbil samajhte haiñ

naqsh maazī ke jo baaqī haiñ miTā mat denā
ye buzurgoñ kī amānat hai gañvā mat denā

har ek samt manāzir the shahr-e-māzī ke
jidhar nigāh uThī aa.ine nazar aa.e

jab bhī maazī ke nazāre ko nazar jā.egī
shaam ashkoñ ke sitāroñ se sañvar jā.egī

kabhī kabhī yaad meñ ubharte haiñ naqsh-e-māzī miTe miTe se
vo āzmā.ish dil o nazar kī vo qurbateñ sī vo fāsle se

dukh-bharī dāstān maazī kī
haal kī be-ruḳhī kā qissa huuñ

kah diyā naañ vo merā maazī thā
is pe ab baat bhī nahīñ hogī

fazā-e-zulmat-e-māzī meñ ai mire hamdam
Dhake Dhake se mirī kāmrāniyoñ ke nishāñ

hamāre daur-e-māzī kī na ham se pūchh ai 'hamdam'
vahī achchhe haiñ lamhe zindagī ke jo guzar jaa.eñ

pukārtā hai mujhe kaun mere maazī se
ki aaj ruḳh pe mire chhā ga.ī shafaq phir se

dhīmā dhīmā sā nuur jaise tah-e-sāz
baḌhtā jaatā hai chhaTke tāroñ kā gudāz

haal se ab samjhautā kar ke tāza-dam ho lo
mustaqbil tak Dho na sakoge maazī kā tābūt

javāb de na sakoge palaT ke maazī ko
ik ek lamha vo chubhte savāl pūchhegā

ahd-e-māzī jo thā ajab pur-hāl
ek vīrān haal chhoḌ gayā

le ke maazī ko jo haal aayā to dil kaañp gayā
jab kabhī un kā ḳhayāl aayā to dil kaañp gayā