Tags-Mazi

tere maazī ke saath dafn kahīñ
merā ik vāqi.a nahīñ maiñ huuñ

nashāt-e-imroz kī qasam hai ki dil ne sab mahfileñ bhulā diiñ
diye the maazī ne daaġh jitne vo ḳhud-ba-ḳhud miTte jā rahe haiñ

bhūlte jaate haiñ maazī ke dayār
yaad aa.eñ bhī to sab yaad nahīñ

matā-e-hāl na maazī kā koī sarmāya
nadī meñ vaqt kī har chiiz ko Dubo baiThā

aaj maazī ke fasāne vo suneñge ai 'charḳh'
merī barbād umīdoñ ke khañDar dekheñge

kuredne se na baaz aayā raakh maazī kī
vo āḳhir uñgliyāñ apnī jalā ke baiTh gayā

koī maazī ke jharokoñ se sadā detā hai
sard paḌte hue sho.aloñ ko havā detā hai

aa.ine par aaj ke jamne na de maazī kī dhuul
taaki terā aane vaalā kal nazar aane lage

hamāre daur ke insān ḳhud apnī hī zid nikle
talab maazī kī hotī hai qadam fardā meñ rakhte haiñ

ye jo maazī kī baat karte haiñ
sochte hoñge haal se aage

luTā ke maazī nazar is sadī pe rakkhī hai
pe naqsha dekhiye tahsīl haal kā kyā ho

pashmīne sā maazī thā 'tafzīl' samor sā haal
mustaqbil ko uunī havā kī taal pe chhoḌ diyā

azmat-e-raftagāñ hai nazroñ meñ
apne maazī ko DhūñDte haiñ ham

yād-e-māzī meñ umr kaT jaa.e
ḳhaak hai māh-o-sāl meñ ai dost

to kyā maiñ naqsh-e-māzī bhuul baiThā
nahīñ aisā nahīñ aisā nahīñ hai

zarā andāz to dekhe koī in dil-figāroñ kā
palaTte haiñ varaq maazī kā mustaqbil ko rote haiñ

terī navāzishoñ ko bhulāyā na jā.egā
maazī kā naqsh dil se miTāyā na jā.egā

ummīd-e-vafā ke pesh-e-nazar maiñ un kī jafā.eñ bhuul gayā
hai mustaqbil par aañkh mirī maazī ko bhulātā jaatā huuñ

jab bhī maazī ke dayāroñ se guzar hotā hai
kāsa-e-chashm liye phirtī haiñ dar-dar yādeñ

sarv ke saa.e meñ uljhe hue anfās ke raag
māzī-o-hāl ke sañgam pe chalāte rahe aag