Tags-Mehboob

taslīm kar apas kuuñ us kī razā ke uupar
mahbūb kā apas par nit iltifāt paayā

ham to samjhe the qayāmat hai firāq-e-mahbūb
tujh se mil kar bhī magar hashr hī barpā dekhā

maan.e daulat-e-dīdār na ho ai girya
ruḳh-e-mahbūb kā karne de nazārā mujh ko

masjid meñ aa.e hañste hue jab vo gul-badan
ḳhushbū se sehan-e-masjid-e-jāme banā chaman

shauq-e-pā-bosī-e-mahbūb thā varna 'sāqib'
sañg-e-dar par koī mauqa thā jabīñ-sā.ī kā

chāhā bahut valī na muā hijr-e-yār meñ
mahbūb kyā ajal bhī nahīñ iḳhtiyār meñ

dakan meñ zauq thā zauq-e-suḳhan mahbūb thā tujh ko
hameñ ma.alūm hai mulk-e-dakan mahbūb thā tujh ko

vahī hotā hai jo mahbūb ko manzūr hotā hai
mohabbat karne vaalā har tarah majbūr hotā hai

hai vo chanchal kāmanī mahbūb saare shahr ko
dekh kar jis ko nazar merī palaTtī jaa.e hai

mere mahbūb tum ho yaar tum ho dil-rubā tum ho
ye sab kuchh ho magar maiñ kah nahīñ saktā ki kyā tum ho

dast-e-qudrat ne banāyā hai tujhe ai mahbūb
aisā Dhālā huā sāñche meñ badan hai kis kā

charāġh-e-bazm-e-ḳhudā huā hai ḳhudā ne mahbūb use kahā hai
ye shaam se lau lagī hai dil ko ki dekhne us bashar ko chaliye

koī mahbūb us kī jaan kā saa.il jo hotā hai
jhukā letā hai 'bahr' āñkheñ muravvat aa hī jaatī hai

aa ga.ī sadma-e-furqat se ajal āshiq kī
hijr-e-mahbūb firāq-e-jasad-o-jāñ niklā

ratjage vo bhī nashāt-e-ġham-e-mahbūb ke saath
husn vāloñ ne baḌā kaam kiyā ho jaise

merī mahbūb ye aañsū haiñ ki motī ruḳh par
un ko is tarah na bekār gañvā maan bhī jā

un kā anjām hai sar-bulandī jin ke dil meñ nahīñ ḳhud-pasandī
jin ko mahbūb hai ḳhāksārī un ko aatī nahīñ ḳhud-satā.ī

kyuuñ baiThe haiñ ham vāda-e-mahbūb pe ḳhush ḳhush
kyā kho.e talavvun bhī dar-andāz nahīñ hai

jis meñ kuchh hotī hai ummīd-e-visāl-e-mahbūb
itnī khaltī nahīñ vo gardish-e-daurāñ mujh ko

mizāj-e-ishq ho mānūs-e-zindagī itnā
ki misl-e-ḳhalvat-e-mahbūb ho bharī duniyā