Tags-Mehfil

zindagī meñ to vo mahfil se uThā dete the
dekhūñ ab mar ga.e par kaun uThātā hai mujhe

ġhair se duur, magar us kī nigāhoñ ke qarīñ
mahfil-e-yār meñ is Dhab se alag baiThā huuñ

sunā hai ġhair kī mahfil meñ tum na jāoge
kaho to aaj sajā luuñ ġharīb-ḳhāne ko

ek mahfil se uThāyā hai dil-e-nāshād ne
ek mahfil meñ dil-e-nāshād le jaane lagā

aaj apnī mahfil meñ hai balā kā sannāTā
dard hai na taskīñ hai hosh hai na mastī hai

sham.a hai sar-e-mahfil kuchh kahā nahīñ jaatā
shola-e-zabāñ le kar baat ko tarastī hai

mahfil meñ aaj marsiya-ḳhvānī hī kyuuñ na ho
āñkhoñ se bahne dījiye paanī hī kyuuñ na ho

laaj rakhnī paḌ ga.ī hai dostoñ kī
ham bharī mahfil meñ jhūTe ho ga.e haiñ

din ko ThiThurtī dhuup meñ Tāñgeñ pasāriye
rātoñ ko jaag jaag ke mahfil sajā.iye

tujh se bhī duur tak koī aisī jagah nahīñ
mahfil meñ apnī to nazar aa.e jahāñ se duur

sard ho chukī mahfil
aur tū ne parvāne

us kī mahfil meñ chale ho to 'ziyā'
dīda-o-dil pe bhī pahra hogā

vo bhī mahfil meñ chalī aa.ī hai pīchhe pīchhe
maiñ to ghar se isī tanhā.ī ke Dar se niklā

merī sachchī chāhat dekhī kah baiThā vo mahfil meñ
mere sab dīvānoñ meñ se ye dīvāna achchhā hai

ḳhamosh mahfil-e-a.adā meñ duur baiThe haiñ
ġhazab hai to bhī vo ā.ankhoñ meñ khaa.e jaate haiñ

ye kis zohra-jabīñ kī anjuman meñ aamad aamad hai
bichhāyā hai qamar ne chāñdnī kā farsh mahfil meñ

nahīñ raushan diloñ kī qadr kuchh arbāb-e-zāhir ko
ijāzat baiThne kī sham.a ko dī kis ne mahfil meñ

vahī gul hai gulistāñ meñ vahī hai sham.a mahfil meñ
vahī yūsuf hai zindāñ meñ vahī lailā hai mahmil meñ

jahān-e-dil kī is iztirārī se bāhar aa kar chalo chaleñ 'shād'
ḳhushī kī mahfil ko phir sajā.eñ udāsiyoñ ko harām kar ke

mutrib-ba-lab-e-la.alīñ sāqī-ba-mai-o-mīnā
is garmi-e-mahfil meñ īmān pighaltā hai