Tags-Mehfil

qadr-shanās-e-sher-o-suḳhan hote haiñ jahāñ par ai 'tābish'
us mahfil meñ sher sunānā kitnā achchhā lagtā hai

bas ik tirā chehra hī na thā mahfil-e-gul meñ
belā bhī thā champā bhī chamelī bhī vahīñ thī

parvāna hone kī bhī ijāzat nahīñ mujhe
ālam-fareb hai tirī mahfil to kyā karūñ

kuchh is andāz se vo apnī mahfil meñ bulāte haiñ
ki insāñ ke qadam uThne se pahle kaañp jaate haiñ

dard ke naam se vāqif na jahāñ ho koī
aisī mahfil meñ hameñ bhī biThā do yaaro

ai ġhazal terī mahfil meñ paa.ī jagah
ik ġhalīcha bichhāte uThāte hue

sajānī hotī hai jis raat chāñd ko mahfil
sitāre shaam se chhat par utarne lagte haiñ

anjuman huuñ maiñ kabhī zaat se apnī 'shiblī'
aur mahfil meñ bhī rah kar kabhī tanhā huuñ maiñ

nuur tū mujh se farāvāñ huā mahfil mahfil
ġham nahīñ sham-e-sifat maiñ ne jalāyā ḳhud ko

jo soz-e-mohabbat se na ho sho.ala-ba-dāmāñ
vo sham.a kabhī raunaq-e-mahfil nahīñ hotī

sahar tak sab kā hai anjām jal kar ḳhaak ho jaanā
bane mahfil meñ koī sham.a yā parvāna ho jaa.e

na hosh-e-ḳhalvat na fikr-e-mahfil ayaañ ho ab kis pe hālat-e-dil
maiñ aap hī apnā ham-nafas huuñ mirā koī ham-nafas nahīñ hai

nigāh-e-adl se dekheñ to mīr-e-mahfil ke
jalāl-o-māl muāvin haiñ aib-poshī meñ

TikTikī bāñdhe hue dekh rahā thā tum ko
tum ne 'shañkar' kā bhī mahfil meñ tamāshā dekhā

tum ruuTh chuke dil TuuT chukā ab yaad na aao rahne do
is mahfil-e-ġham meñ aane kī zahmat na uThāo rahne do

bahut ro.egī duniyā us bashar kī bad-nasībī par
jo dāġh-e-ārzū le kar tirī mahfil se niklegā

jo bhī sharīk-e-mahfil-e-rindāñ na ho sakā
vo bevaqūf kāmil-e-īmāñ na ho sakā

ye soch kar tirī mahfil se ham chale aa.e
ki ek baar to baḌh jaa.e hausla dil kā

de gayā umr kī tanhā.ī mujhe
ek mahfil meñ milā thā mujh ko

ab tabī.at ke na lagne pe khulā mahfil meñ
ik vahī shoḳh nahīñ vaise to sab hai sā.īñ