Tags-Mehfil

is ālam-e-vīrāñ meñ kyā anjuman-ārā.ī
do roz kī mahfil hai ik umr kī tanhā.ī

jhilmilāne lagīñ mahfil meñ charāġhoñ kī laveñ
ruḳhsat ai ham-nafaso sub.h kā taarā chamkā

mere junūñ ke faiz se garmi-e-shauq aa ga.ī
sard thī mahfil-e-tarab mere kalām ke baġhair

'nadīm' dānishvaroñ kī mahfil kabhī na kuchh bhī atā karegī
chalo ki ''jānī-pura'' jahāñ pe vo yaar kamle bulā rahe haiñ

jo dil ne kahī lab pe kahāñ aa.ī hai dekho
ab mahfil yārāñ meñ bhī tanhā.ī hai dekho

mahfil se uThāne ke sazā-vār hamīñ the
sab phuul tire baaġh the ik ḳhaar hamīñ the

koī mahfil baḌī ḳhāmosh hai yādoñ se phir kah do
rabāb-e-jāñ koī chheḌe koī dam-sāz tak aa.e

dast-e-pur-ḳhūñ ko kaf-e-dast-e-nigārāñ samjhe
qatl-gah thī jise ham mahfil-e-yārāñ samjhe

ye soch kar tirī mahfil se ham chale aa.e
ki ek baar to baḌh jaa.e hausla dil kā

dīvāna kiyā sāqi-e-mahfil ne sabhī ko
koī na bachā us nazar-e-hosh-rubā se

ham yahāñ bhī nahīñ haiñ ḳhush lekin
apnī mahfil se mat nikāl hameñ

raunaq-e-mahfil na aa.ī kaam kuchh
zindagī jab ḳhud se uktā.ī rahī

jis din se uTh ke ham tirī mahfil se aa.e haiñ
lagtā hai lākhoñ kos kī manzil se aa.e haiñ

mahfil-e-dost meñ chaltā to huuñ ai dīda-e-shauq
ishq kā raaz na afsana-e-mahfil ho jaa.e

kahānī apnī apnī ahl-e-mahfil jab sunāte haiñ
mujhe bhī yaad ik bhūlā huā afsāna aatā hai

us kī raunaq aur hai us kā asar kuchh aur hai
un kī mahfil meñ mirā mātam nahīñ to kuchh nahīñ

maiñ sajā kar ise bahut ḳhush huuñ
phir bhī mahfil javāñ nahīñ lagtī

har ghar har mahfil us kī āvāz ke motī
bām-e-havā se barseñge

ḳhatm huī shorīda-sarī lab sil se ga.e
mahfil mahfil hañsnā-hañsānā chhoḌ diyā

go maiñ na rahūñ mahfil-e-jānāñ meñ magar roz
'taslīm' yuuñ hī zikr rahegā mire dil kā