Tags-Mehfil

ye duniyā hai to kyā ai ham-nafas tafsīr-e-ġham kiije
vahī ādāb-e-mahfil bhī vahī ādāb-e-zindāñ bhī

rañj sahne kī nahīñ tāqat mujhe
ġhair kī mahfil meñ jaanā chhoḌ de

bas chhat ke shagāfoñ ko paḌe ghūrte rahiye
yaarā bhī nahīñ mahfil-e-yārāñ bhī nahīñ hai

baiThe ho 'azīz' apne aise ahbāb kī rañgīñ mahfil meñ
tauba ke tasavvur se pahle īmāñ ke ḳhalal kī baat karo

kuchh rūp-nagar kā zikr karo kuchh rañg-mahal kī baat karo
rañgīn fazā hai mahfil kī rañgīn ġhazal kī baat karo

apnī mahfil meñ raqīboñ ko bulāyā us ne
un meñ bhī ḳhaas unheñ jin kī zarūrat dekhī

nigāh paḌtī hai un par tamām mahfil kī
vo aañkh uThā ke nahīñ dekhte kisī kī taraf

girā na aañkh se aañsū fareb-e-qismat par
sukūn jis se ho vo iztirāb paidā kar

ye jo mahfil meñ mire naam se maujūd huuñ maiñ
maiñ nahīñ huuñ mirā dhokā hai koī dekh na le

aa.iye hasrat-bhare dil meñ kabhī
kyā ye mahfil aap kī mahfil nahīñ

bharam thā dil meñ jo mahfil kā vo bhī dil se gayā
suḳhan to biktā thā tum sāma.īn bech aa.e

dard kī baat kisī hañstī huī mahfil meñ
jaise kah de kisī turbat pe latīfa koī

kyā qahr hai jo raunaq-e-mahfil thā ai 'nadīm'
vo shaḳhs shahar-bhar meñ akelā dikhā.ī de

ik nazar Daalī bharī mahfil meñ jab
rañg mere āsmānī ho ga.e

sham.a kī tarah jale ham tirī mahfil meñ magar
tū ne kis vaqt hameñ kaun sī shab yaad kiyā

muskurā do zarā ḳhudā ke liye
sham-e-mahfil meñ raushnī kam hai

mahfil-e-raqs ho ki sher-o-sharāb
tum nahīñ ho to bazm-e-mātam hai

garmā.e tahzīb kī mahfil chamkāyā afsāne ko
rañg bikherā āñchal āñchal ruup kā maan baḌhāne ko

bujhtī huī sham.oñ kā dhuāñ hai sar-e-mahfil
kyā rañg jame āḳhir-e-shab soch rahe haiñ

raat kaT jaatī hai bāteñ vahī sunte sunte
sham-e-mahfil sanam-e-charb-zabāñ hai ki jo thā