Tags-Mehman

'shauq'-sāhab un kī rag rag se haiñ vāqif ḳhuub ham
us kā ho jaa.e divāla jis ke hoñ mehmān shaiḳh

zindagī aa tirā armān badal kar dekheñ
dil meñ hai jo mire mehmān badal kar dekheñ

tum rañg ho tum nuur ho tum shīsha ho tum jaam
kirnoñ se bharī sub.h ho tāroñ se bharī shaam

us ke jaane se mirā dil hai mire siine meñ
dam kā mehmān charāġh-e-saharī kī sūrat

dam kā mehmāñ huuñ maiñ ab bhī tū
aa ke mehmān nahīñ rahne kā

chaa.e kī pyālī meñ tasvīr vahī hai ki jo thī
yuuñ chale jaane se mehmān kahāñ jaatā hai

us ghar meñ karam jab tū ne kiyā kuchh der Thahar ai tīr-e-nazar
bosa tire qadmoñ kā dil ne kis shauq se ai mehmān liyā

bastī se bāhar sāñpoñ ne bhī to kuchh phūñkā hogā
aadhī raah se lauTā ho mehmān saperā kyā ma.alūm

qātil tū ghar pe kaise kahūñ maiñ burā bhalā
izzat-ma.āb hai mirā mehmān bhī to hai

mire dil ne zulfoñ meñ maskan kiyā hai
ye mehmān hai aa.e tauqīr kiijo

kal vāqif-e-kār apne se kahtā thā vo ye baat
'jur.at' ke jo ghar raat ko mehmān ga.e ham

vo gayā bhī to us kī yādoñ ke
kitne mehmān mere ghar Thahre

maiñ samajhtā huuñ mujhe aap ne mehmān kiyā
kyuuñ ta.āruf na karāyā gayā mehmānoñ se

jis ke baġhair pul kā guzarnā muhāl thā
us jān-e-jāñ kī yaad bhī mehmān ban ga.ī

phir se āñkhoñ ke sāġhar chhalakne lage mauj-dar-mauj aañsū nikalne lage
'tāb' ghar meñ vo mehmān phir aa gayā jis ke aane kī koī ḳhabar bhī na thī

āḳhir janāb-e-shaiḳh haiñ mehmān-e-mai-kada
do-chār jaam de ke mudārāt kījiye

ai ahd-e-ravāñ maiñ tirā mehmān huā thā
lekin tire logoñ ne baḌī be-ḳhabarī kī

hameñ hai ghar se ta.alluq ab is qadar baaqī
kabhī jo aa.e to do din ko mehmān kī tarah

mehmān mezbāñ hī ko bahkā ke le uḌā
ḳhushbū-e-gul bhī ghuum rahī hai sabā ke saath

mire ghar meñ hai kyā rakkhā tirī ḳhidmat-guzārī ko
ki mere paas to mehmān-e-jāñ ġham ke nivāle haiñ