Tags-Mehman

kis kā hai ḳhauf rokne vaalā hī kaun hai
har roz kyuuñ na jā.iye mehmān jā.iye

kyā bad-gumāniyāñ haiñ unheñ mujh ko hukm hai
ghar meñ ḳhudā ke bhī to na mehmān jā.iye

insān ko hai ḳhāna-e-hastī meñ lutf kyā
mehmān aa.iye to pashemān jā.iye

subah subah ik ḳhvāb kī dastak par darvāza khulā' dekhā
sarhad ke us paar se kuchh mehmān aa.e haiñ

khole hue gesū na dikhā.e mujhe sūrat
mehmān mire ghar na hue raat tumhārī

itne be-mehr mausamoñ meñ bhī us ne had kar dī mehrbānī kī
kiyā mehmān mujh musāfir ko aur phir dil se mezbānī kī

jise bahār ke mehmān ḳhālī chhoḌ ga.e
vo ik makān abhī tak makīñ kī chaah meñ hai

ajnabī logoñ kī dil par dhaak baḌhtī jā.egī
apne hī ghar meñ koī mehmān hotā jā.egā

hameñ ḳhabar hai vo mehmān ek raat kā hai
hamāre paas bhī sāmān ek raat kā hai

mehmān thā kis kā tū shab ai maah
aatā hai jo is malāl ke saath

mehmāñ-navāz un sā koī dūsrā nahīñ
jī meñ hai un ke ghar kabhī mehmān jā.iye

bazm ḳhālī nahīñ mehmān nikal aate haiñ
kuchh to afsāne mirī jaan nikal aate haiñ

Dartā huuñ dekh kar dil-e-be-ārzū ko maiñ
sunsān ghar ye kyuuñ na ho mehmān to gayā

mehmān kah rahā hai'' baḌā ḳhush-nasīb hai
jo shaḳhs mezbān hai urdū zabān kā

chand lamhāt ke mehmān nazar aate haiñ
vo bagūle jo sar-e-sehn-e-chaman uTThe haiñ

kisī ḳhayāl kī sarshārī meñ jārī-o-sārī yaarī meñ
apne-āp koī aa.egā aur ban jā.egā mehmān

kaise sapne kis kī aashā kab se haiñ mehmān bane
tanhā.ī ke suune āñgan meñ yādoñ ke saa.e

kamre meñ dhuāñ dard kī pahchān banā thā
kal raat koī phir mirā mehmān banā thā

barakat hamāre rizq meñ aa.egī kis tarah
ghar meñ hamāre jab koī mehmān hī nahīñ