Tags-Mehman

party Thap mehmān-e-ḳhusūsī shāi.r-e-āzam
patlī galī meñ paan kā khokhā DhūñD rahā hai

us ke jaane se mirā dil hai mire siine meñ
dam kā mehmān charāġh-e-saharī kī sūrat

milnā bhī pur-takalluf duurī kī dilkashī bhī
ik duuje ke liye ham mehmān ho ga.e haiñ

kamre meñ dhuāñ dard kī pahchān banā thā
kal raat koī phir mirā mehmān banā thā

muztarib kyuuñ na hoñ armāñ dil meñ
qaid mehmān huā jaatā hai

mehmān hai faqīr hai sun leñge aap 'rind'
murshid kā apne kar ke pyālā nikal gayā

kyā kaam kar rahā hai ye mehmān-e-zindagī
bhartā hai kyuuñ gunāh se dāmān-zindagī

dil meñ ḳhayāl-e-ishq thā mehmān kī tarah
armāñ sajā thā 'mīr' ke dīvān kī tarah

ruḳh-e-jāñ se tire paikān badal jaate haiñ
ḳhāna-e-qalb ke mehmān badal jaate haiñ

ghar sajānā to kujā 'shāz' luTā bhī na sakūñ
in se shikva hai ki vo kyuuñ mire mehmān bane

ai dil kisī kī yaad bhī aur iztirāb bhī
itnā nahīñ ḳhayāl ki mehmān ghar meñ hai

be-bulā.e chalā aatā maiñ na kahtā tujh se
aaj to mehrbāñ ho jā tirā mehmān bhī huuñ

aan kar mil tū 'nazīr' apne se jaan
ab vo koī aan kā mehmān hai

har baar apne dil kī bāteñ zabāñ pe lā kar
ham ne musībatoñ ko mehmān kar liyā hai

tū jahāñ meñ chār-din mehmān hai
is ke aage aur hī sāmān hai

simaTtā jā rahā hai dā.era mālik makāñ kā
makāñ par qabza-e-mehmān baḌhtā jā rahā hai

ḳhush-fahmiyoñ kī baat alag hai magar ye ghar
jis ke liye sajā hai vo mehmān tum nahīñ

hazāroñ bakheḌe hazāroñ jhamele hazāroñ tavahhum hazāroñ taraddud
magar aap aa.eñ to mehmān rakh luuñ mire dil meñ ab bhī hai utnī samā.ī

jismoñ kī sardiyoñ meñ phir jal ga.e haiñ rishte
sab ek dūsre ke mehmān ho ga.e haiñ

hote haiñ ḳhatm ab ye lamhāt zindagī ke
mehmān haiñ jahāñ meñ ham aur do ghaḌī ke