Tags-Mehman

dil se agar kabhī tirā armān jā.egā
ghar ko lagā ke aag ye mehmān jā.egā

ham ko jo rañj pahuñchte haiñ vo kis se kahiye
ham ko mehmān samajhtī nahīñ duniyā apnā

sāhab-e-ḳhāna banā aatā hai jab aatā hai ishq
aur apne ghar meñ ḳhud mehmān ho jaate haiñ ham

āThvīñ shab bhī mahz kuchh ghanToñ kī mehmān hai
gar manānā hotā to ab tak manā letā mujhe

kyā kahīñ duniyā meñ ham insān yā haivān the
ḳhaak the kyā the ġharaz ik aan ke mehmān the

chūhoñ ne ek roz bulāyā billī ko mehmān
aur dikhā.ī lakḌī kī ik building ālī-shān

sameT le ga.e sab rahmateñ kahāñ mehmān
makān kāTtā phirtā hai mezbānoñ ko

koī makīñ thā na mehmān aane vaalā thā
to phir kivāḌ khulā kis ke intizār meñ thā

mire kamre kā ik tārīk gosha
koī mehmān raushan kar gayā hai

jaise mehmāñ koī aa.e kisī mehmān ke ba.ad
sher maiñ ne bhī kahe haiñ na.e ruj.hān ke ba.ad

yaqīn barsoñ kā imkān kuchh dinoñ kā huuñ
maiñ tere shahr meñ mehmān kuchh dinoñ kā huuñ

vo terī yaad ke mehmān ho ga.e ruḳhsat
ujaḌ ga.ī mire dil kī sarā.e āḳhir-e-shab

sitāre kā raaz rakh liyā mehmān maiñ ne
ik ujle ḳhvāb aur aañkh ke darmiyān maiñ ne

jahāñ chaukhaT hai vaañ ziina thā pahle
mirā mehmān nā-bīnā thā pahle

gulāb-e-surḳh se ārāsta dālān karnā hai
phir ik shām-e-visāl-āñgī tujhe mehmān karnā hai

bātil ke haath pe ye zulm haq vāloñ se bai.at lete the
mehmān banā kar laa.e the paanī bhī na piine dete the

kashmakash-hā-e-alam se ab ye 'hasrat' jī meñ hai
chhuT ke in jhagḌoñ se mehmān-e-qazā ho jā.iye

dil jale kūcha-e-jānāñ ke fusūñ-zīnoñ par
abr aatā thā to mehmān huā karte the

ḳhalvat-e-dil meñ chain se baiTho kis se takalluf karte ho
ghar hai tumhārā tum ho yahāñ mehmān bhī sāhab-ḳhāna bhī

kitnā kamzor hai īmān patā lagtā hai
ghar meñ aayā huā mehmān burā lagtā hai