Tags-Mehndi

hai rañg siyāhī liye juuñ us kī hinā kā
hāthoñ pe har ik ke ye udāhaT nahīñ aatī

mire dil ke ḳhuun kī misl thā tujhe yaad hai mire dilrubā
koī rañg rañg-e-hinā bhī thā tire naqsh-hā-e-jamāl meñ

vaañ rañg-hā ba-parda-e-tadbīr haiñ hunūz
yaañ shola-e-charāġh hai barg-e-hinā mujhe

dhanak se phuul se barg-e-hinā se kuchh nahīñ hotā
badan sahrā hue āb-o-havā se kuchh nahīñ hotā

mire kadū ko ġhanīmat samajh ki bāda-e-nāb
na madrase meñ hai baaqī na ḳhānqāh meñ hai

ye bhī nayā sitam hai hinā to lagā.eñ ġhair
aur us kī daad chāheñ vo mujh ko dikhā ke haath

kis tarah phail ga.ī bū-e-hinā har jānib
us ke baare meñ abhī maiñ ne to sochā bhī nahīñ

qabā-e-zard pahan kar vo bazm meñ aayā
gul-e-hinā ko hathelī meñ thaam kar baiThā

baat meñ kohna rivāyāt kā lutf
haath par rañg-e-hinā baaqī hai

nīm-rañg us kī hinā dekh na marte gar ham
phuul turbat ke hamāre na gulābī hote

chamaktā hai shahīdoñ kā lahū parde meñ qudrat ke
shafaq kā husn kyā hai shoḳhi-e-rañg-e-hinā kyā hai

zaḳhm-dar-zaḳhm samāñ taaza kiyā karte haiñ
ghol kar shoḳhī-e-maqtal ko hinā meñ ham log

maiñ malūñ talvoñ se āñkheñ vo kaheñ samjhūñgā maiñ
yaad rakh phīkā agar rañg-e-hinā ho jā.egā

jhaḌ ga.e baal Dhīlī paḌ ga.ī khaal
dil meñ ab ḳhushbu-e-hinā kaisī

pūchh mat rusvā.i-e-andāz-e-istiġhnā-e-husn
dast marhūn-e-hinā ruḳhsār rahn-e-ġhāza thā

aap ke haath jo chhū jaa.eñ kisī Daalī se
gul hī kyā ḳhaar se bhī bū-e-hinā aatī hai

ḳhvāb jal jaa.eñ mirī chashm-e-tamannā bujh jaa.e
bas hathelī se uḌe rañg-e-hinā āhista

unhīñ ke kaam ilāhī mirā lahū aa.e
rañgeñ jo haath lahū meñ hinā kī bū aa.e

yahāñ to shoḳhiyoñ ko apnī zebā.ī se matlab hai
lahū meñ bhī machalnā aur hinā ke saath bhī rahnā

kī haq se farishtoñ ne 'iqbāl' kī ġhammāzī
gustāḳh hai kartā hai fitrat kī hinā-bandī