Tags-Mehndi

shaam ke haath ne jis vaqt lagā lī mehñdī
mujhe us vaqt tirā rañg-e-hinā yaad aayā

kabhī mahaktā thā jo lucknow hinā kī tarah
isī dayār meñ likkhī hai shahriyat merī

ḳhuun mirā kar ke lagānā na hinā mere ba.ad
dast rañgīñ na hoñ añgusht-numā mere ba.ad

ai parī pā-bos se mahrūm kyuuñ rakkhā mujhe
ḳhūñ-girafta is chaman meñ kyā hinā thī maiñ na thā

mere hote be-takalluf hāthā-pā.ī ġhair se
qābil is rutbe ke zālim kyā hinā thī maiñ na thā

vaah kyā rañg-e-hinā hai ki tirī chuTkī se
surḳh ho jaa.e agar ho lab-e-sofār safed

hinā bhī to lagā dekhī pe vo aalam kahāñ hai ab
hamāre ḳhuuñ se jo hāthoñ pe zebā.ī kā aalam thā

ḳhair-bāshad ki mire ḳhuun kī sī
surḳhī ai rañg-e-hinā tujh meñ hai

yuuñ pisne ko dil laakh piseñ barg-e-hinā par
vo haath kabhī ḳhuun meñ bhartā hī nahīñ hai

maiñ us kā haath dekh rahā thā ki daf.atan
simTā simaT ke rañg-e-hinā ho gayā vo shaḳhs

qāfila qāfila maqtal kī taraf jā.eñge log
shoḳh pahle se bahut rañg-e-hinā hai ab ke

mujhe saaf batā.e nigār agar to ye pūchhūñ maiñ ro ro ke ḳhūn-e-jigar
male paañv se kis ke haiñ dīda-e-tar kaf-e-pā pe jo rañg-e-hinā na rahā

chhuptā hai ḳhuun bhī kahīñ muTThī to kholiye
rañgat yahī hinā kī yahī bū hinā kī hai

ek lakīr ro paḌī donoñ hatheliyoñ ke biich
rañg-e-hinā chhupā gayā haath lahū lahū rahe

lahū jigar kā huā sarf-e-rañg-e-dast-e-hinā
jo saudā sar meñ thā sahrā khañgālne meñ gayā

mujh ko dikhlāo na tum rañg-e-hinā us ko jalāo
bhejnī jis ne karī tum ko ye sauġhāt shurūa

miltā nahīñ patā tire chhalle ke chor kā
ai gul-badan ye shoḳhī-e-duzd-e-hinā na ho

jo mehñdī kā buTnā malā kījiyegā
pasīne ko itr-e-hinā kījiyegā

mash.had-e-āshiq se kosoñ tak jo ugtī hai hinā
kis qadar yā-rab halāk-e-hasrat-e-pā-bos thā

chūmne ke liye thaam rakhkhūñ koī dam vo haath
aur vo paañv rañg-e-hinā ke liye chhoḌ duuñ