Tags-Ahbaab

shikāyat dostoñ kī hai mire ahbāb ke lab par
chalo ab dushmanoñ ko aazmā kar dekh letā huuñ

tamām shahr giraftār hai aziyyat meñ
kise kahūñ mire ahbāb kī ḳhabar rakkhe

fātiha paḌh kar yahīñ subuk ho leñ ahbāb chalo varna
maiñ ne apnī mayyat ko madfan se alag kar rakkhā hai

yād-e-ahbāb kī ḳhushbū se mahaktī shāmeñ
kuchh kaho hotī haiñ kambaḳht dil-āzār bahut

kar sake dafn na us kūche meñ ahbāb mujhe
ḳhaak meñ dil kī kudūrat ne diyā daab mujhe

apne dukh kā mājrā chheḌā nahīñ
ye mirā ehsān hai ahbāb par

allāh re tajāhul mire ahbāb se pūchhā
dīvāna hai kyā 'sābir'-e-farzāna kisī kā

kabhī to rishtoñ ko ḳhuun ke bhī fareb-e-vahm-o-gumān samjhā
kabhī vo narġhe meñ dushmanoñ ke hujūm-e-ahbāb dekhtā hai

zamāna-sāzī-e-ahbāb abhī nahīñ samjhā
samajh rahā huuñ zamāna hai sāzgār mujhe

ḳhudā kā shukr hai girdāb se nikal aayā
maiñ us ke halqa-e-ahbāb se nikal aayā

apne ahbāb kī ḳhushī ke liye
bilā-irāda bhī muskurā.e haiñ

ayyārī-e-siyāsat-e-ahbāb dekhiye
chāhā kisī ke ho ke raheñ ho nahīñ sake

ahbāb kā karam hai agar nukta-chīñ na hoñ
varna ham aap mo'tarif apnī ḳhatā ke haiñ

naala kar lene deñ lillāh na chheḌeñ ahbāb
zabt kartā huuñ to taklīf sivā hotī hai

shahr-e-āzurda-fazā meñ ābgīnoñ ko ba-rū-e-kār laate
shaam kī in ḳhānumāñ vīrāniyoñ meñ sohbat-e-ahbāb hote

ik halqa-e-ahbāb hai tanhā.ī bhī us kī
ik ham haiñ ki har bazm meñ tanhā nazar aa.e

ġham musalsal ho to ahbāb bichhaḌ jaate haiñ
ab na koī dil-e-tanhā ke qarīñ aa.egā

ahbāb ke fareb-e-musalsal ne ye kiyā
parchhā.iyoñ se apnī hī Darne lagī huuñ maiñ

sahmā rahtā huuñ bahut halqa-e-ahbāb meñ maiñ
chaar dīvār meñ aate hī bikhar jaatā huuñ

'kaifī' masīh-e-sher haiñ ahbāb aur bhī
ik tujh se jān-e-tāza nahīñ is Dhachar meñ hai