Tags-Ahbaab

dil ke har daaġh se vābasta hai rūdād-e-sitam
rañj baḌhtā gayā juuñ juuñ mujhe ahbāb mile

ahbāb mulāqāt ko jo aate haiñ
nāhaq mujhe ġham de ke chale jaate haiñ

hai ye ahbāb ko isrār ki holī khelūñ
toḌ duuñ aaj to maiñ zohd-o-taqaddus kā fusūñ

mujhe ahbāb kī pursish kī ġhairat maar Dālegī
qayāmat hai agar ifshā huā rāz-e-alam merā

dil-e-ahbāb meñ ghar hai shagufta rahtī hai ḳhātir
yahī jannat hai merī aur yahī bāġh-e-iram merā

ḳhudā ne ilm baḳhshā hai adab ahbāb karte haiñ
yahī daulat hai merī aur yahī jāh-o-hasham merā

ahbāb haath uThā.eñ hamāre ilaaj se
sehat-pazīr ishq kā bīmār ho chukā

mere ahbāb mire haal pe rote haiñ magar
kaash hotā koī girte ko uThāne vaalā

ban na sakī ahbāb se apnī
vo daanā the ham dīvāne

bure din burī sā.ateñ ishq meñ haiñ
sab ahbāb ham se bichhaḌte raheñge

tahsīn ke laa.eq tirā har sher hai 'akbar'
ahbāb kareñ bazm meñ ab vaah kahāñ tak

ahbāb se rakhtā huuñ kuchh ummīd-e-sharāfat
rahte haiñ ḳhafā mujh se bahut log isī se

'shohrat' ki hai ab vaj.h-e-pareshānī-e-ahbāb
uTh jā.egā jis roz tū aa.egā bahut yaad

kuchh haal ke andhe sāthī the kuchh maazī ke ayyār sajan
ahbāb kī chāhat kyā kahiye kuchh yaad rahī kuchh bhuul ga.e

gum-sum sā jo ik shaḳhs hai dālān meñ baiThā
us kā bhī koī halqa-e-ahbāb to hogā

apnī ġhairat se bachā.e rahā apne ko 'azīz'
varna ahbāb ke hāthoñ hī fanā ho jaatā

āzād haiñ sharāb ke aadī nahīñ 'habīb'
ahbāb gar pilā.eñ to inkār bhī nahīñ

apne ahbāb kī jānib na uThāo nazreñ
dekhnā hai agar 'aḳhtar' to sambhal kar dekho

ahbāb bhī haiñ ḳhuub ki tash.hīr kar ga.e
merā sukūt ishq se ta.abīr kar ga.e