Tags-Ahbaab

suḳhan samajhte haiñ 'ja.afar'-razā ka.ī ahbāb
jo rāh-e-shauq meñ naġhmāt kā sarāb milā

safar meñ bhī musāfir ke bahalne ko ba-ḳhāmoshī
kabhī ahbāb kā qissa kabhī zikr-e-vatan hogā

garmi-e-mahfil vahī hai jam.a haiñ ahbāb bhī
hastī-e-parvāna o sham-e-shabistāñ ab bhī hai

ahbāb se ummīd hai bejā mujh ko
ummīd-e-atā-e-haq hai zebā mujh ko

vo saarī bāteñ maiñ ahbāb hī se kahtā huuñ
mujhe harīf ko jo kuchh sunānā hotā hai

ābād kū-e-chāk-e-garebāñ jo phir huā
dast-e-raqīb o dāman-e-ahbāb dekhnā

yuuñ bhī dil ahbāb ke ham ne gaahe gaahe rakkhe the
apne zaḳhm-e-nazar par ḳhush-fahmī ke phāhe rakkhe the

aaḌe aayā na koī mushkil meñ
mashvare de ke haT ga.e ahbāb

merī hairat ko bhī tārīḳh meñ mahfūz karo
mere ahbāb meñ har shaḳhs buroTas niklā

tū ab ke bhī nahīñ Duubā 'shanāvar'
bahut hairān haiñ ahbāb mere

dost ahbāb se lene na sahāre jaanā
dil jo ghabrā.e samundar ke kināre jaanā

dāḳhil na dushmanoñ meñ na ahbāb meñ shumār
madd-e-fuzūl huuñ maiñ tumhāre hisāb meñ

junūn ke josh se begāna-vār haiñ ahbāb
hamārā haal vatan meñ huā safar kā sā

'tanvīr' rah-e-zīst meñ tanhā ye safar kyuuñ
vo lutf kahāñ pursish-e-ahbāb kahāñ hai

ik shaḳhs ki yaktā thā darīda-dahnī meñ
zikr us kā magar pyaar se ahbāb meñ aayā

ā.ankhoñ se bahe miTTī meñ mile ahbāb ko parvā kuchh na huī
mātam mire ik ik aañsū kā mizhgāñ kī saf-e-mātam ne kiyā

ye rañg laa.ī hai ahbāb kī ḳhirad-mandī
ujaḌ ke rah ga.iiñ mahfil kī raunaqeñ kyā kyā

jam.a hai majma-e-ahbāb fazā meñ terī
ai tasavvur ye muraqqa.a na miTānā hargiz

maiñ huuñ ik majma-e-ahbāb kā bichhḌā gulchīñ
mujh ko gul-dasta-e-rañgīñ na dikhānā hargiz

itnī mushkil meñ bhī ahbāb na Dāleñ mujh ko
ki sambhalnā bhī na chāhūñ to sambhāleñ mujh ko