Tags-Mohabbat

maiñ har haal meñ muskurātā rahūñgā
tumhārī mohabbat agar saath hogī

tanhā.ī se bachāv kī sūrat nahīñ karūñ
mar jā.ūñ kyā kisī se mohabbat nahīñ karūñ

ḳhuub e.azāz giraftār-e-mohabbat kā huā
un ko hai madd-e-nazar qaid-e-davām-e-maḳhsūs

sirf bachchoñ kī mohabbat meñ ye rusvā.ī huī
varnā sāhil par banāte ret kā ghar aur ham

dariyā-e-mohabbat se 'muhib' le hī ke chhoḌī
mujh ashk ne āḳhir dur-e-nāyāb kī mīrās

tamannā hai fuzūñ hoñ shorisheñ jazb-e-mohabbat kī
dil-e-muztar kī baḌhtī aur bhī vahshat to achchhā thā

chāhiye hai mujhe inkār-e-mohabbat mire dost
lekin is meñ tirā inkār nahīñ chāhiye hai

ye dasht-e-tark-e-mohabbat ye tere qurb kī pyaas
jo izn ho to tirī yaad se guzar jā.ūñ

zulm aur jabr ke ahkām se ḳhāmosh magar
mohr paimān-e-mohabbat kī lagā.e hue hoñT

har ek show se mohabbat hai is liye mujh ko
maiñ nafratoñ ke tasavvur se bachnā chāhtā huuñ

tark-e-mohabbat par bhī hogī un ko nadāmat ham se ziyāda
kis ne kī hai kaun karegā un se mohabbat ham se ziyāda

koī tamannā koī masarrat dil ke qarīb aane hī na dī
kis ne kī hai ishq meñ yaaro ġham se mohabbat ham se ziyāda

tujh sā hasīñ aur ḳhūn-e-mohabbat
vahm hai shāyad surḳhi-e-dāman

zamāna kufr-e-mohabbat se kar chukā thā gurez
tirī nazar ne palaT dī havā zamāne kī

bīmār-e-mohabbat kī ayādat ko na aa.e
kyā hijr davā thā mujhe darmāñ se gilā hai

jitne bhī ahl-e-siyāsat haiñ vatan-dushman haiñ
sab ne phūñkā hai mohabbat kā chaman dānista

hameñ sab ahl-e-havas nā-pasand rakhte haiñ
ki ham navā-e-mohabbat buland rakhte haiñ

ġham ko rañgīn banā deñge mohabbat ke ḳhutūt
aap kuchh ham ko likheñ aap ko kuchh ham likkheñ

merī vafā to nādānī thī tum ne magar ye kyā Thānī thī
kaash na karte mujh se mohabbat kaash na hotā dil kā ye aalam

koī ādāb-e-mohabbat ko bhalā kyā jaa.e
zillateñ jitnī haiñ āshiq kī vo tauqīreñ haiñ