Tags-Mohabbat

abhī mī.ād baaqī hai sitam kī
mohabbat kī sazā hai aur maiñ huuñ

yahī be-laus mohabbat yahī ġham-ḳhvāri-e-ḳhalq
aur merāj kise kahte haiñ insānoñ kī

mohabbat phuul banñe par lagī thī
palaT kar phir kalī kar lī hai maiñ ne

ye kyā kahā junūñ hai mohabbat kī intihā
ai be-ḳhabar chale haiñ isī intihā se ham

is dā.ī-e-amn-o-mohabbat ke raste meñ dushman kī faujeñ
yuuñ barsoñ phail ga.iiñ jaise chaḌhte dariyā kī maujeñ

shoḳh nazroñ meñ jo shāmil barhamī ho jā.egī
aur bhī jins-e-mohabbat qīmtī ho jā.egī

mohabbat kī tarah ābād rakkhegā ḳhudā us ko
miTā saktī nahīñ duniyā-e-hādis kī havā us ko

fazāoñ meñ mohabbat kī haqīqat āshnā huuñ maiñ
ik āġhosh-e-adab meñ parvarish paatā rahā huuñ maiñ

tamām rasm uThā lī ga.ī mohabbat meñ
diloñ ke biich magar qaid-o-band kitnā hai

dahr se ham yūñhī be-kār chale jaate the
phir ye sochā ki chalo ek mohabbat kar jaa.eñ

Dhañg jiine kā na marne kī adā māñgī thī
ham ne to jurm-e-mohabbat kī sazā māñgī thī

merī chāhat kā do-ālam meñ bharam rah jaa.e
tū mujhe merī mohabbat se pyārā ho jā

us ko paanā hai to kashtī se kinārā kar le
Duub kar bahr-e-mohabbat kā kinārā ho jā

baaqī hai ḳhāk-e-kū-e-mohabbat kī tishnagī
apne lahū ko aur bhī arzāñ kareñge ham

nusḳhe meñ tabīboñ ne likhā aur hī kuchh hai
bīmār-e-mohabbat kī davā aur hī kuchh hai

rāsta de ki mohabbat meñ badan shāmil hai
maiñ faqat ruuh nahīñ huuñ mujhe halkā na samajh

latīf pardoñ se the numāyāñ makīñ ke jalve makāñ se pahle
mohabbat ā.īna ho chukī thī vajūd-e-bazm-e-jahāñ se pahle

ek muddat se bhaTaktī huī phirtī hai 'salīm'
kūcha-e-dil meñ mohabbat ke talab-gār kī guuñj

zabān raqs meñ hai aur jhūmtā huuñ maiñ
ki dāstān-e-mohabbat sunā rahā huuñ maiñ

kahāñ kā zabt-e-mohabbat kahāñ kī tāsīreñ
tasalliyāñ dil-e-muztar ko de rahā huuñ maiñ