Tags-Mohabbat

na-jāne rāz-e-mohabbat kā hashr kyā hogā
banā liye haiñ ka.ī apne rāz-dāñ ham ne

nigāh sirf tahayyur havās vārafta
liyā thā jazb-e-mohabbat kā imtihāñ ham ne

bhā.ī-chāre se mohabbat se ravādārī se
qaum ko jiine kā andāz sikhātā aayā

tumheñ bhī javāban mohabbat milegī
mohabbat se dil meñ samā kar to dekho

shaam bāñhoñ meñ liye raat kī raanī aa.ī
ai mohabbat tujhe dene ko salāmī aa.ī

ishq kī chāhiye ta.alīm abhī aur use
jo mohabbat adab ādāb se kam vāqif hai

zamāna badlā miTī javānī na vo mohabbat na zindagānī
bas ek bholī sī yaad hai jo ba-rañg-e-dāġh-e-kuhan hai baaqī

miTā diye be-sutūn charḳh-e-kuhan ne shīrīñ-laqā hazāroñ
magar mohabbat ke lab par ab bhī tarāna-e-kohkan hai baaqī

vo maazī jo hai ik majmua ashkoñ aur aahoñ kā
na jaane mujh ko is maazī se kyuuñ itnī mohabbat hai

jab tum se mohabbat kī ham ne tab jā ke kahīñ ye raaz khulā
marne kā salīqa aate hī jiine kā shu.ūr aa jaatā hai

khel ye kaisā khel rahī hai dil se terī mohabbat
ik pal kī sarshārī de aur dinoñ malāl meñ rakkhe

tasavvur meñ salām aate raheñge
mohabbat ke payām aate raheñge

kabāb-e-laḳht-e-dil mere namak sūd-e-mohabbat haiñ
tumhāre vāste laayā huuñ siine par zarā chakhkho

vaa.iz ko ūñch-nīch mohabbat kī kyā patā
ye mas.ale nahīñ ulamā-e-kirām ke

kitnā achchhā lagtā hai ik aam sā chehra bhī
sirf mohabbat-bharā tabassum lab par laane se

us se na iztirāb-e-mohabbat ko pochhiye
jo jī rahā ho dard kā ehsāñ liye hue

dil-e-nākām ko ulfat se terī kaam hai saaqī
mohabbat be-niyāz-e-ibrat-e-anjām hai saaqī

rah rah ke maze detī hai kyā kyā ḳhalish-e-zaḳhm
ye dard-e-mohabbat ke ḳharīdār se pūchho

jannat kā jumūd achchhā hai yā kashmakash-e-ishq
ye jurm mohabbat ke gunahgār se pūchho

zanjīr-e-mohabbat kī asīrī meñ hai kyā lutf
pech-o-ḳham-e-kākul ke giraftār se pūchho