Tags-Mohabbat

mehrbāñ hotā hai jab jaan mohabbat 'tarzī'
dil-e-bīmār sambhaltā hai ġhazal hotī hai

be-vafā maiñ ne mohabbat se kahā thā aap ko
lījiye ab bā-vafā taslīm kar letā huuñ maiñ

charāġh-e-rāh-e-mohabbat thī ḳhāk-e-ahl-e-vafā
qadam qadam pe 'karam' raushnī nazar aa.ī

kyā chhoḌeñ asīrān-e-mohabbat ko vo jis ne
sadqe meñ na ik murġh-e-giraftār bhī chhoḌā

niiñd bīmār-e-mohabbat ko kahīñ aatī hai
sub.h tā-shām agar bād-e-subuk-gām chale

paimān-e-mohabbat ḳhatm huā ab zikr se us ke fā.eda kyā
muñh bikhrī kaḌiyoñ ke na milā tayyār na.ī zanjīr na kar

har dil hai hayāt kā sarmāya har dil meñ josh mohabbat kā
tū 'ārzū' aur kahegā kyā bas rahne bhī de taqrīr na kar

mohabbat be-bahā shai hai magar taqdīr achchhī thī
mata-e-do-jahāñ de kar ye saudā kar liyā maiñ ne

allāh agar taufīq na de insān ke bas kā kaam nahīñ
faizān-e-mohabbat aam sahī irfān-e-mohabbat aam nahīñ

ik havā-e-be-takāñ se āḳhirash murjhā gayā
zindagī bhar jo mohabbat ke shajar botā rahā

tamām jism ko āñkheñ banā ke raah tako
tamām khel mohabbat meñ intizār kā hai

ḳhud ko bhūle hue duniyā se gurezāñ rahnā
ye kahīñ terī mohabbat hī kā aalam to nahīñ

auj-e-ausān pe chaḌh chaḌh ke mohabbat kī sharāb
jab utartī hai to kuchh aur nasha kartī hai

ban jā.ūñ na begāna-e-ādāb-e-mohabbat
itnā na qarīb aao munāsib to yahī hai

vo jo qaa.il hī na thā merī mohabbat kā use
rafta rafta had-e-iqrār talak le aayā

jab se ki mohabbat huī pyāre haiñ ye aañsū
jaise ki merī aañkh ke taare haiñ ye aañsū

haañ haañ unheñ dāmān-e-mohabbat meñ jagah do
āñkheñ haiñ mirī aur tumhāre haiñ ye aañsū

ma.asūm nigāhoñ ko nibhāte haiñ ye aksar
poshīda mohabbat ke ishāre haiñ ye aañsū

pās-e-ādāb-e-mohabbat ki ba-īñ raaz o niyāz
muddatoñ bād-e-sabā se na koī baat huī

chāroñ taraf hai sham-e-mohabbat kī raushnī
parvāne DhūñD DhūñD ke laa.ī jidhar mile