Tags-Mohabbat

mirī mohabbat ke aa.ine se tum apnī āñkheñ churā rahī ho
magar mire dil ko chupke chupke churā rahī haiñ tumhārī āñkheñ

tirā hī naam nikaltā hai har tarīqe se
kisī bhī tarah mohabbat kā istiḳhārā kareñ

mohabbat ḳhvāb se bāhar talak
rasta banā saktī hai

maiñ samajhtā huuñ use apnī mohabbat kī kashish
tū ne muñh pher ke bhī mujh ko jo qātil dekhā

majbūrī-e-mohabbat insāf chāhtī hai
shikva bhī hai tumhīñ se fariyād bhī tumhīñ se

hamārī zindagī kyā hai mohabbat hī mohabbat hai
tumhārā bhī yahī dastūr ban jaa.e to achchhā ho

mohabbat jaada hai manzil nahīñ hai
ye mushkil āḳhirī mushkil nahīñ hai

ham tirā ahd-e-mohabbat Thahre
lauh-e-nisyāñ kī jasārat Thahre

maqtal-e-jāñ kī zarūrat Thahre
ham ki shāyān-e-mohabbat Thahre

dhundlā ga.e the naqsh-e-mohabbat kuchh is tarah
pahchāntī thī aañkh to dil māntā na thā

is ne hañsī hañsī meñ mohabbat kī baat kī
maiñ ne 'adīm' us ko mukarne nahīñ diyā

sailāb shaqāvat ke muqābil hai tumhāre
ye fasl-e-mohabbat ḳhas-o-ḳhāshāk nazar meñ

sar-gashta-e-mohabbat dār-e-mehan meñ phir kar
dekh aa.e gosha gosha rāhat nahīñ kahīñ bhī

ham jurm-e-mohabbat kī sazā paa.e hue haiñ
be-vaj.h nahīñ hai ki jo sharmā.e hue haiñ

hai barbat-e-dil saḳhti-e-mizrāb se larzāñ
talḳhi-e-mohabbat kā maza paa.e hue haiñ

har nafas hashr-ba-dāmāñ hai junūn-e-ġham meñ
kis tarah ahl-e-mohabbat ko qarār aa jaa.e

vo jis meñ amn-o-mohabbat kā bol baalā ho
charāg-e-ilm se har samt ik ujālā ho

mujhe gum-shuda dil kā ġham hai to ye hai
ki is meñ bharī thī mohabbat kisī kī

ham jī se guzar jaanā āsān samajhte the
dekhā to mohabbat meñ ye kaam bhī mushkil thā

tamām tiira manāzil se maiñ guzar jā.ūñ
jo ek sham-e-mohabbat jale to kyā kam hai!