Tags-Mohabbat

agar dard-e-mohabbat se na insāñ āshnā hotā
na kuchh marne kā ġham hotā na jiine kā mazā hotā

phir us ke ba.ad ḳhudā jaane kab mayassar hoñ
ye chand lamhe mohabbat ke jāvedānī kar

shikve kī chubhan mujh ko sadā achchhī lagī hai
ye fart-e-mohabbat kī adā achchhī lagī hai

lamhāt-e-mohabbat sabhī yaksāñ nahīñ hote
ai jān-e-vafā terī jafā achchhī lagī hai

kisī nigāh kī nas nas meñ tairte nishtar
vo ibtidā-e-mohabbat kī rāhateñ mat pūchh

kyā zarūrī hai ye iqrār kī muhtāj rahe
ham mohabbat ko yuuñ lāchār kareñ bhī ki nahīñ

kahte haiñ is se mohabbat kā maza baḌhtā hai
karnī hai chhoTī sī takrār kareñ bhī ki nahīñ

baaqī kī mohabbat meñ dil saaf huā itnā
jab sar ko jhukātā huuñ shīsha nazar aatā hai

mohabbat kī hameñ fursat nahīñ thī
jamāl-e-yār ne chauñkā diyā thā

ham se vo tark-e-ta.alluq kar chuke
aur phir un kī mohabbat kam nahīñ

maiñ mohabbat kī raushnī ban kar
vaqt kī kahkashāñ meñ rahtā huuñ

kaahe kā paas ab to rusvā.ī duur pahuñchī
rāz-e-mohabbat apnā kis se chhapā rahā hai

mohabbat ho to jaatī hai mohabbat kī nahīñ jaatī
ye sho.ala ḳhud bhaḌak uThtā hai bhaḌkāyā nahīñ jaatā

mohabbat ke liye kuchh ḳhaas dil maḳhsūs hote haiñ
ye vo naġhma hai jo har saaz par gaayā nahīñ jaatā

mohabbat asl meñ 'maḳhmūr' vo rāz-e-haqīqat hai
samajh meñ aa gayā hai phir bhī samjhāyā nahīñ jaatā

tañg aa ke mohabbat tark na kī ham garche rahe nākām sadā
sarshār the lazzāt-e-hasrat-o-ġham se hote bhalā bezār to kyā

kabhī kabhī to mohabbat kī zindagī ke liye
ḳhud un ko ham ne ubhārā hai barhamī ke liye

adā-e-jaur-e-mohabbat meñ nāgavār nahīñ
ḳhulūs chāhiye ai dost barhamī ke liye

vo taqāzā-e-mohabbat thā to maiñ ne uf na kī
phir to zālim umr bhar dil pe sitam kartā rahā

jalāl apnī mohabbat kā sab se ūñchā hai
badan meñ aise to bīmāriyāñ bahut sī haiñ