Tags-Mohabbat

bahut sambhāl ke rakhnā use hifāzat se
khilaunā TuuT na jaa.e mirī mohabbat kā

sulh-e-kul meñ mirī guzre hai mohabbat ke biich
na to takrār hai kāfir se na dīñ-dār se bahs

uḌā hai rafta rafta rañg tasvīr-e-mohabbat kā
huī hai rasm-e-ulfat be-viqār āhista āhista

butān-e-sarv-qāmat kī mohabbat meñ na phal paayā
riyāzat jin pe kī barsoñ vo naḳhl-e-be-samar nikle

kyā dekh ke lauTe haiñ mohabbat kī galī se
kyā baat hai āvāz kyuuñ bharrā.ī bahut hai

mohabbat hai azal ke din se shāmil merī fitrat meñ
bilā tafrīq shaiḳh o barhaman se ishq hai mujh ko

lāzim hai mohabbat hī mohabbat kā badal ho
tasvīr jo dekhe use tasvīr bhī chāhe

merī rūdād-e-mohabbat ko na sunñe vaale
tujh meñ vo baat kahāñ jo tirī tasvīr meñ hai

na din ko hai kuchh sukūñ mayassar na shab ko aatī hai niiñd ham ko
yahī mohabbat kī ibtidā hai to phir kise intihā kaheñ ham

is guzargāh-e-mohabbat meñ kahāñ aa gayā maiñ
dost chup-chāp barābar se nikal jaate haiñ

apne dil kī lagī ko chhupāte ho kyuuñ
ye mohabbat kī ghaḌiyāñ gañvāte ho kyuuñ

mohabbat meñ ik aisā vaqt bhī dil par guzartā hai
ki aañsū ḳhushk ho jaate haiñ tuġhyānī nahīñ jaatī

'jigar' vo bhī ze-sar-tā-pā mohabbat hī mohabbat haiñ
magar un kī mohabbat saaf pahchānī nahīñ jaatī

ye sābirīn-e-mohabbat ye kāshifīn-e-junūñ
inhī ke sañg inhīñ auliyā ke saath huuñ maiñ

kal phir us ke naam par ik aur patthar rakh diyā
ham gadāgar bhī nahīñ haiñ na mohabbat bhiik hai

ye aag mohabbat kī bujhā.e na bujhe hai
bujh jaa.e jo ik baar jalā.e na jale hai

hai bāġh-e-mohabbat meñ vafā kā jo hasīñ gul
murjhā jo gayā phir to khilā.e na khile hai

bātoñ man jo kar jaa.e hai iqrār-e-mohabbat
phir baat koī us se banā.e na bane hai

sitam ki ahl-e-mohabbat bhī rah ga.e nākām
samajh na paa.e jamāl-e-hazār-pahlū ko

mirī be-qarārī mirī āh-o-zārī ye vahshat nahīñ hai to phir aur kyā hai
pareshāñ to rahnā magar kuchh na kahnā mohabbat nahīñ hai to phir aur kyā hai