Tags-Mohabbat

sajī hai bazm-e-mohabbat ye jaan kis ke liye
yahāñ to logoñ meñ bezāriyāñ bahut sī haiñ

zālim thā vo aur zulm kī aadat bhī bahut thī
majbūr the ham us se mohabbat bhī bahut thī

kis tarah se yaksāñ hoñ mohabbat ke taqāze
parvānoñ ke dil aur haiñ sham.oñ kī zabāñ aur

dar-e-mohabbat kā ik gadā huuñ parī kā tālib na huur kā huuñ
tujhī ko tujh se maiñ chāhtā huuñ bas aur merā savāl kyā hai

bas ab mohabbat se haath uThāo bhale ko kahte haiñ maan jaao
na aap ko is tarah miTāo 'jalīl' dekho to haal kyā hai

tum bhī ab kuchh aur socho is mohabbat ke sivā
maiñ bhī ab uktā gayā huuñ ek hī āzār se

mohabbat sī shai us ne mujh ko atā kī
ki ḳhush ḳhush chalūñ umr barbād kar ke

har chiiz nahīñ hai markaz par ik zarra idhar ik zarra udhar
nafrat se na dekho dushman ko shāyad vo mohabbat kar baiThe

fitna-e-aql ke juuyā mirī duniyā se guzar
merī duniyā meñ mohabbat ke sivā kuchh bhī nahīñ

e'tibār-e-ārzū kā karr-o-far jaatā rahā
dil se irfān-e-mohabbat kā asar jaatā rahā

jis pe kartī hai mohabbat merī da.avā aap haiñ
jis kā dil shām-o-sahar paḌhtā vazīfa aap haiñ

mohabbat ek pākīza amal hai is liye shāyad
simaT kar sharm saarī ek bose meñ chalī aa.ī

mohabbat ne akelā kar diyā hai
maiñ apnī zaat meñ ik qāfila thā

duniyā se dar-guzar ki guzargah ajab hai ye
darpesh ya.anī 'mīr' hai jaanā jahāñ se bhī

āġhāz-e-mohabbat meñ tavakkul hai zarūrī
mat soch kisī fā.eda nuqsān ke baare

bas yahī soch ke rahtā huuñ maiñ zinda is meñ
ye mohabbat hai koī mar nahīñ saktā is meñ

mujh se mohabbat bhī hai us ko lekin ye dastūr hai us kā
ġhair se miltā hai hañs hañs kar mujh se hī sharmātā hai

mohabbat kī alāmat ho ga.ī hai
ye kis be-kas kī rehlat ho ga.ī hai

ek mohabbat aur vo bhī nākām mohabbat
lekin is se kaam chalāyā jā saktā hai

zindagī asl meñ ta.amīr-e-mohabbat hai 'hayāt'
de ke ham dahr ko paiġhām-e-amal jaate haiñ