Tags-Mohabbat

tirī raah meñ har qadam jaan denā musībat bhī aa.e to sar apne lenā
mohabbat kī kashtī ba-har-hāl khenā rifāqat nahīñ hai to phir aur kyā hai

shahīdoñ kā sartāj jannat-maqām
mohabbat kī me.arāj zī-ehtirām

vahī jahāñ hai tirā jis ko tū kare paidā
ye sañg-o-ḳhisht nahīñ jo tirī nigāh meñ hai

ġhamgīn manāzir na ḳhudā dekhe dikhā.e
ham pyaar mohabbat se ye tasvīr bhareñge

poshāk-e-mohabbat thī phaTī ham ne vo sī dī
ehsās kī nagrī meñ khilā rañg-e-shahīdī

sadma but-e-kāfir kī mohabbat kā na pūchho
ye choT to ka.abe hī ke patthar se lagī hai

dilbarī jazb-e-mohabbat kā karishma hai faqat
kuchh karāmat nahīñ jaadū nahīñ e.ajāz nahīñ

umr-bhar ḳhvāb-e-mohabbat se na bedār hue
isī kirdār se ham sāhab-e-kirdār hue

nafratoñ kā badal mohabbat hai
aag kā ik javāb paanī hai

ab ye tāsīr-e-mohabbat par qasīda kyā zarūr
jazba-e-be-tābī-e-dil thā jo kaam aayā to kyā

ahl-e-ġham tum ko mubārak ho fanā-āmādgī
lekin īsār-e-mohabbat jaan de denā nahīñ

tirā ishq aur hijr ālām do the
mohabbat meñ ik dil pe kohrām do the

mohabbat meñ dil-o-jāñ hosh o tāqat sab akārat hai
kaho koī aql kuuñ jā kar baḌā bistār mat kiijo

mohabbat kī junūñ-añgeziyoñ se ham bhī vāqif haiñ
javānī meñ javāno ham ne bhī ye khel khelā thā

vo rah-o-rasm na vo rabt-e-nihāñ baaqī hai
phir bhī is dil ko mohabbat kā gumāñ baaqī hai

aarzū kūcha-e-mohabbat se
ḳhanda dar-dil ba-chashm-e-nam guzrī

vafā-kesh-o-vafā-nā-āshnā kyā
mohabbat meñ balāoñ kā gila kyā

vafā.eñ ain īmān-e-mohabbat
mohabbat meñ vafāoñ kā sila kyā

mohabbat kī ye vo manzil hai jis meñ
davā-e-dard-o-dard-e-lā-davā kyā

us se ab tark-e-mohabbat kā gila kyā ma.anī
mujh ko taslīm ki atvār the beDhab mere