Tags-Mohabbat

kaun kahtā hai mohabbat kī zabāñ hotī hai
ye haqīqat to nigāhoñ se bayāñ hotī hai

vo bhī hamāre naam se begāne ho ga.e
ham ko bhī sach hai un se mohabbat nahīñ rahī

aisā nahīñ ki un se mohabbat na ho magar
pahle sā josh pahle sī shiddat nahīñ rahī

maiñ mohabbat ke naam par 'rif.at'
ġham-nasīboñ se pyaar kartā huuñ

hamāre ba.ad rivāyat chalī mohabbat kī
nizām-e-ālam-e-hastī ko falsafa to milā

sa.ī-o-amal kī ruuh mohabbat ke saath thī
vo kuchh na kar sake jo mohabbat na kar sake

dahlīz-e-mohabbat se sameTe haiñ hamesha
taare kisī shīrīñ ke kisī hiir ke motī

mujhe apnī galī meñ dekh kar vo naaz se bole
mohabbat se dabe jaate haiñ hasrat le ke uTTheñge

tirā rāz-e-mohabbat le ke aa.e le ke jā.eñge
amānat le ke baiThe haiñ amānat le ke uTTheñge

kuchh laag kuchh lagāv mohabbat meñ chāhiye
donoñ tarah kā rañg tabī.at meñ chāhiye

vo ibtidā-e-ishq meñ hāsil huī mujhe
jo baat intihā-e-mohabbat meñ chāhiye

hai jis pe mohabbat kī nazar hogā pareshāñ
ai sāna-e-gul hijr kī shab kis ke liye hai

dam mohabbat kā bhar nahīñ aatā
raaz ifshā to kar nahīñ aatā

dād-ḳhvāhān-e-mohabbat kā ye amboh-e-kasīr
dil mirā dekh ke hañgāma-e-mahshar ulTā

yā zamāne meñ mohabbat ke fasāne haiñ ġhalat
yā mirā naqsh-e-vafā hai mire dil par ulTā

haram-e-nāz kī chilman se ulajhne vaalī
dil-e-betāb-e-mohabbat kī duā huuñ maiñ bhī

ai sham.a ham se soz-e-mohabbat ke zabt siikh
kam-baḳht ek raat meñ saarī pighal ga.ī

merī terī dūriyāñ haiñ ab ibādat ke ḳhilāf
har taraf hai fauj-ārā.ī mohabbat ke ḳhilāf

mayassar ḳhud nigah-dārī kī āsā.ish nahīñ rahtī
mohabbat meñ to pesh-o-pas kī gunjā.ish nahīñ rahtī

dil milne pe bhī pahlū na milā dushman to baġhal hī meñ hai chhupā
qātil hai mohabbat kī ye hayā tum aur kahīñ ham aur kahīñ