Tags-Mohabbat

hamāre shahr meñ 'akmal' abhī tak
mohabbat bāñTne vaalā shajar hai

apnī taḳhlīq se hotī hai mohabbat sab ko
sochtā huuñ ki zarā bhī ġham-e-fardā na karūñ

bin mohabbat ke tū hañstī huī in āñkhoñ kī
bhīgī jhilmil ko kabhī bhī na samajh pā.egī

phir se ek mohabbat bhī kī jā saktī hai
tere ġham se haath chhuḌāyā jā saktā hai

haiñ sar-nigūñ jo tāna-e-ḳhalq-e-ḳhudā se ham
kyā ho ga.e kisī kī mohabbat meñ kyā se ham

koī to baḌh ke ye kahtā ki rah-ravān-e-vatan
hai kārvān-e-mohabbat kā rāhbar tanhā

khulā jo nāma-e-a.amāl hashr meñ merā
bas ek jurm-e-mohabbat mire hisāb meñ thā

maiñ āshnā-e-mohabbat to be-qarār hī thā
vo āshnā-e-mohabbat na thā azaab meñ thā

ye lailā majnūñ ye hiir rāñjhā ye shīrīñ farhād kī mohabbat
thī aisī shiddat kahīñ jo un ke visāl hote kamāl hote

kahīñ ye apnī mohabbat kī intihā to nahīñ
bahut dinoñ se tirī yaad bhī nahīñ aa.ī

phir deñge vahī mashvara-e-tark-e-mohabbat
ahbāb-numā halqa-e-yārāñ se guzar jā

sarfroshān-e-mohabbat se na hogī aañkh chaar
muñh jo us kī teġh kā ai saḳht-jānī phir gayā

merī hī tarah mire sher haiñ rusvā 'sāġhar'
kis ko is tarah mohabbat ne sunāyā hogā

mohabbat aur qurbānī meñ hī ta.amīr muzmar hai
dar-o-dīvār se ban jaa.e ghar aisā nahīñ hotā

ye to nahīñ ki tum se mohabbat nahīñ mujhe
itnā zarūr hai ki shikāyat nahīñ mujhe

maiñ aur de sakūñ na tire ġham ko zindagī
aisī to zindagī se mohabbat nahīñ mujhe

namalī aur na duudī hai na manshārī hai
nabz-e-bīmār-e-mohabbat kī hai raftār judā

marnā to bahut sahal sī ik baat lage hai
jiinā hī mohabbat meñ karāmāt lage hai

yārab āġhāz-e-mohabbat kā ba-ḳhair anjām ho
dil lagā kar ho rahī hai kyā pashemānī mujhe

chaman-zār-e-mohabbbat meñ ḳhamoshī maut hai bulbul
yahāñ kī zindagī pābandi-e-rasm-e-fuġhāñ tak hai