Tags-Mohabbat

zer-e-shamshīr-e-sitam 'mīr' taḌapnā kaisā
sar bhī taslīm-e-mohabbat meñ hilāyā na gayā

mohabbat to ham ne bhī kī aur bahut kī
magar husn ko ishq karnā na aayā

ik mohabbat hī pe mauqūf nahīñ hai 'tābish'
kuchh baḌe faisle ho jaate haiñ nādānī meñ

gar ġhair se kuchh tum ko mohabbat nahīñ hotī
to ham ko ye rashk-e-qalaq-afzā nahīñ hotā

apnī urdu to mohabbat kī zabāñ thī pyāre
ab siyāsat ne use joḌ diyā maz.hab se

zamāna kah rahā hai jaane kyā kyā
kabhī maiñ bhī mohabbat kar ke dekhūñ

dil-āzārī mohabbat meñ kahāñ ma.alūm hotī hai
ajab taskīñ pas-e-soz-e-nihāñ ma.alūm hotī hai

kis qadar ghis-piT gayā ye qāfiya
jis taraf dekho mohabbat hai yahāñ

ḳhvāhish-e-sūd thī saude meñ mohabbat ke vale
sar-ba-sar is meñ ziyāñ thā mujhe ma.alūm na thā

siine meñ dard-e-mohabbat raaz ban kar rah gayā
ab vo hālat hai ki kar sakte nahīñ fariyād bhī

mohabbat meñ ho to bas itnā kahūñgā
maza chaar din kā hai lambī sazā ho

muddat se kiye baiThe haiñ go tark-e-mohabbat
haañ bā.is-e-taskīn vahī naam hai ab bhī

rūdād-e-mohabbat na rahī is ke sivā yaad
ik ajnabī aayā thā uḌā le gayā dil ko

mohabbat āsmāñ ko jab zamīñ karne kī zid Thahrī
to phir buzdil usūloñ kī sharāfat darmiyāñ kyuuñ ho

ai jazb-e-mohabbat tū hī batā kyūñkar na asar le dil hī to hai
sīdhī bhī chhurī TeḌhī bhī chhurī dil-doz nazar qātil hī to hai

ye mohabbat kā sila thā ishq kā anjām thā
phuul kā hañsnā hī us kī maut kā paiġhām thā

mohabbat ho to ho bhī jaa.e sar-bar chashm-e-pur-fan se
abhī se kyā kahūñ 'nātiq' fusūñ ye bhī fusūñ vo bhī

us kī dahlīz se uTh jā.ūñ magar
log socheñge mohabbat na rahī

koī jā ke mere masīhā se kah de ḳhudā ke liye aag dil kī bujhā de
mohabbat ke sho.ale bhaḌakne lage haiñ kahīñ ḳhirman-e-zindagī jal na jaa.e

ho un kā dīdār qismat se jab bhī adā ho ga.ī hai namāz-e-mohabbat
nikal aa.e jab bhī vo parde se bāhar nigāhoñ ne jhuk jhuk ke sajde sunā.e