Tags-Mother

ma.asūm ko phir maar diyā kokh meñ maañ kī
qisse jo sune ham ne vo ġhamnāk bahut the

vo zamīn ho ki ho āsmāñ ye diyā hamesha jalā rahe
maiñ kisī safar meñ rahūñ magar mire saath maañ kī duā rahe

maañ dhartī ko pesh-suḳhan ke rañg-birañge phuul
bhaag bharī ko bheñT sunahre misre kā lobān

maañ kī āġhosh meñ hañstā huā ik tifl-e-jamīl
jis tarah zehn-e-azal meñ ho abad kī taḳhīl

bhar ga.e zaḳhm masīhā.ī ke marham ke baġhair
maañ ne kī haiñ mire jiine kī duā.eñ shāyad

jaise be-māñ ke tifl ho ye dil
aaj kuchh is tarah se sahmā hai

godiyāñ maañ kī ho ga.iiñ suunī
māmtā kā jahān TuuT gayā

chhoḌ kar maañ ko kyā mile jannat
pahlā hī pā.edān TuuT gayā

yahī sūraj thā isī tarah dahakte din the
mere sar par se na bantā kabhī maañ kā āñchal

god meñ maañ kī paḌā rahtā kahānī suntā
koī totā kisī mainā ke lagātā kājal

hazāroñ sher mere so ga.e kāġhaz kī qabroñ meñ
ajab maañ huuñ koī bachcha mirā zinda nahīñ rahtā

yaad hai ḳhuub mujhe mere liye rab ke huzūr
maañ kā ro ro ke duā karnā vo sajda karnā

nīl-gagan meñ tair rahā hai ujlā ujlā puurā chāñd
maañ kī lorī sā bachche ke duudh kaTore jaisā chāñd

gayā pardes beTā jab bhī le kar ḳhvāb sab apne
to phir din-rāt maañ ne apnī āñkhoñ ko khulā rakkhā

bistar-e-marg pe maañ thī to na the sāmne tum
bahut hī mahñgā paḌā hai chale jaanā tum ko

'mīrā' maañ mirī aag ko koī gun nahīñ aayā
us mūrat ko raam karūñ ye hunar nahīñ rakhtī

maiñ apnī maañ ke vasīle se zinda-tar Thahrūñ
ki vo lahū mire sabr-o-razā meñ raushan hai

vo lamha jab mire bachche ne maañ pukārā mujhe
maiñ ek shāḳh se kitnā ghanā daraḳht huī

tum sivā.e maañ ke ghar ke le lo sab
bas vo ḳhālī sā makāñ merā rahe

āsmāñ ne maañ zamīñ kī god to bhar dī magar
de ke beTe un ko kuchh nā-samjhiyāñ bhī de gayā