Tags-Muflisi

jo bahneñ muflisī se bhā.iyoñ par bojh bantī haiñ
vo mar jaa.eñ to un ke haath meñ shāḳh-e-hinā rakhnā

ai 'ḳhayāl' apne irādoñ ko tavānā rakkho
muflisī aatī nahīñ hai kisī fankār ke paas

rūhoñ kī muflisī ne bahar-hāl ek din
chehra-ā.inoñ se ḳhū-e-shanāsā.ī chhīn lī

muflisī hiss-e-latāfat ko miTā detī hai
bhuuk ādāb ke sāñchoñ meñ nahīñ Dhal saktī

aartī utartī hai ahl-e-zar kī phūloñ se
muflisī ke chehre par āñsuoñ kī maalā hai

javāñ hone se pahle hī buḌhāpā aa gayā ham par
hamārī muflisī par umr kī ujlat ziyāda thī

kisī qabā ko mayassar hai fāḳhera honā
kisī libās meñ paivand muflisī ke haiñ

muflisī ham ne ḳhud-kushī kar lī
maut kā intizār kyā karte

vo muflisī ke din bhī guzāre haiñ maiñ ne jab
chūlhe se ḳhālī haath tavā bhī utar gayā

muflisī chhāñTe use qahr-o-ġhazab ke vāste
jis kā mukhḌā ho shabistān-e-tarab ke vāste

yuuñ libās-e-bosīda māl-o-zar se ḳhālī hai
be-karāñ mohabbat hai muflisī ke dāman meñ

ek gaalī jo kīchaḌ ke mānind chaspāñ huī
hoñT jo kāsa-e-muflisī ban ga.e

yuuñ khiñche muflisī meñ sab rishte
jaise mardūd ho gayā huuñ maiñ

muflisoñ kī zindagī kā zikr kyā
muflisī kī maut bhī achchhī nahīñ

vo ḳhudā ke nek bande haiñ ki jin kī jeb meñ paisa nahīñ hai
muflisī ke board ghar ghar muft bāñTe jā rahe haiñ

in farāvāñ ne.amatoñ aur barkatoñ ke bāvajūd
koī muflis chal diyā hai muflisī se māvarā

muflisī ne jā-ba-jā luuTā hameñ
ab bachā kuchh bhī nahīñ luTvā.eñ kyā

us kī tahī hai jeb aur is kā dimāġh hai tahī
us kī hai muflisī kuchh aur is kī hai muflisī kuchh aur

jahāñ meñ zar kā hai kārḳhāna na koī apnā na hai yagāna
talāsh-e-daulat meñ hai zamāna ḳhudā hī hāfiz hai muflisī kā

vo bhī kyā din the ki jab ye muflisī chhā.ī na thī
''āshiqī qaid-e-sharī.at meñ'' abhī aa.ī na thī