Tags-Mulaqat

dil meñ hai mulāqāt kī ḳhvāhish kī dabī aag
mehñdī lage hāthoñ ko chhupā kar kahāñ rakkhūñ

halāvat zindagī kī hai mulāqāt-e-ahibbā meñ
mazā murde ko tanhā.ī kā hai zinde ko sohbat kā

chamke gā abhī mere ḳhayālāt se aage
vo naqsh ki thā dāġh-e-mulāqāt se aage

vo hameñ bhuul gayā ho to ajab kyā hai 'farāz'
ham ne bhī mel-mulāqāt kī koshish nahīñ kī

yuuñ sar-e-rāh bhī pursish-e-hāl kī is zamāne meñ fursat kisī ko kahāñ
aap se ye mulāqāt rasmī sahī itnī zahmat bhī kuchh kam ināyat nahīñ

ruuh se ruuh kā rabt aisā bane jaise hāthoñ meñ tere mirā haath ho
phir mulāqāt ḳhvāboñ meñ hotī rahe din nikaltā rahe shaam Dhaltī rahe

nahīñ mumkin tamannā-e-mulāqāt un se bar aa.e
ki vo anjān haiñ ai hazrat-e-'sābir' maiñ an-mil huuñ

is tarah mil ki mulāqāt adhūrī na rahe
zindagī dekh koī baat adhūrī na rahe

daf.atan ḳhud se mulāqāt kā ehsās huā
muddatoñ ba.ad jo ab ek ġhazal aur kahī

ek ummīd mulāqāt meñ likkhī sar-e-shām
aur phir āḳhir-e-shab ek ġhazal aur kahī

har mulāqāt meñ hotī haiñ hamāre mābain
chand bāteñ lab-e-guftār se chand āñkhoñ se

shukr hai ai shab-e-hijrāñ ki baḌī muddat par
ho ga.ī dil se mulāqāt bhī bīnā.ī kī

kyā ḳhuub āshnā haiñ ki pahchānte nahīñ
jab bhī mile to pahlī mulāqāt kī tarah

dil se nazdīk haiñ āñkhoñ se bhī kuchh duur nahīñ
magar is pe bhī mulāqāt unheñ manzūr nahīñ

kyā ravish rakkhī hai phir aap ne auroñ ke liye
gar yahī tarz-e-mulāqāt hai apnoñ ke liye

ajiib vaj.h-e-mulāqāt thī mirī us se
ki vo bhī merī tarah shahr meñ akelā thā

daulat hī kā milnā hai baḌī chiiz 'nazīr' aah
bil-farz huī us se mulāqāt to phir kyā

yuuñ sar-e-rāh mulāqāt huī hai aksar
us ne dekhā bhī nahīñ ham ne pukārā bhī nahīñ

ajiib tarz-e-mulāqāt thā sar-e-mahfil
payām saare mile mujh ko guftugū ke baġhair

un se ummīd-e-mulāqāt ke ba.ad ai 'maḳhmūr'
muddatoñ tak na ḳhud apne se mulāqāt huī