Tags-Musafir

peshvā.ī ko chalī jaatī hai ḳhud hī manzil
hai thakā-māñda musāfir koī manzil ke qarīb

shikasta safīna musāfir niDhāl
talātum shab-e-tār bārish havā

kis ke pairoñ ke nishāñ haiñ ki musāfir bhī ab
manzileñ bhuul ke rastoñ se lipaT jaate haiñ

maiñ musāfir thī ki manzil hī nahīñ thī jis kī
tū mire saath kisī rail kī paTrī jaisā

guzar rahe haiñ barābar tabāhiyoñ ke julūs
ye zindagī ke musāfir kahāñ chale jaa.eñ

is galī ke moḌ pe baiThā huuñ kitnī der se
jis tarah koī musāfir huuñ thakā-hārā huā

ajab rāste ke musāfir haiñ ham
na aayā hameñ rāsta māñgnā

kamāl-e-shauq-e-safar bhī udhar hī jaatā hai
kisī safar kā musāfir ho ghar hī jaatā hai

hamīñ haiñ musāfir hamīñ ābla-pā
tamāsha ai gard-e-safar dekhte haiñ

maiñ bhaTkā huā ik musāfir
rah-o-rasm-e-manzil se nā-āshnā.ī pe nāzāñ

rakhnā hai to phūloñ ko tū rakh le nigāhoñ meñ
ḳhushbū to musāfir hai kho jā.egī rāhoñ meñ

ham musāfir the hamārā mustaqar koī na thā
raat jab aa.ī jahāñ aa.ī baserā ho gayā

khule kivāḌoñ ke pīchhe chhupā thā sannāTā
safar se haarā musāfir jab apne ghar aayā

yaar ne luuT liyā mujh vatan-āvāra ko
log ġhurbat meñ musāfir kī ḳhabar lete haiñ

jidhar jī meñ aayā udhar chal paḌe
musāfir kā hotā hai ghar har taraf

hue pareshān sab musāfir na niklī sūrat koī bil-āḳhir
jo raah masdūd thī to kyūñkar idhar se jaate udhar se aate

vo musāfir jo rāste meñ thā
manziloñ se guzar gayā hai kyā

na sañg-e-mīl na naqsh-e-qadam na bāñg-e-jaras
bhaTak na jaa.eñ musāfir adam kī manzil ke

ham musāfir haiñ to jaanā hai kahīñ aur hameñ
ghar kisī aur kā sāmān kisī aur kā hai

adam ke tārīk rāste meñ koī musāfir na raah bhūle
maiñ sham-e-hastī bujhā kar apnī charāġh-e-turbat jalā rahā huuñ