Tags-Naaz

ye sitam kī mahfil-e-nāz hai 'kalīm' is ko aur sajā.e jā
vo dikhā.eñ raqs-e-sitamgarī tū ġhazal kā saaz bajā.e jā

choT khāne kā shauq hai dil ko
nigah-e-nāz kā qusūr nahīñ

'pinhāñ' mirī ġhazloñ ko bahut naaz hai us par
tāsīr kī daulat jo milī dast-e-hunar se

'anvar' ne badle jaan ke lī jins-e-dard-e-dil
aur is pe naaz ye ki ye saudā girāñ na thā

vo duur kab thā harīm-e-jāñ se ki lafz o ma.anī ke naaz uThātī
jo harf hoñToñ pe aa na paa.e vo ban ke ḳhushbū bikhar ga.e haiñ

ishva chālākī karishma naaz ġhamza yaar kā
garche hai qahr-e-ḳhudā par dil ko mere bhā.egā

idhar banī hai dil-e-hazīñ par udhar to sargarm-e-nāz haiñ vo
koī ye aa kar tamāshā dekhe adā hai un kī mamāt merī

rahzanoñ meñ nāz-o-ġhamza kī ye jins-e-dīn-o-dil
juuñ matā-e-burda āḳhir ham-digar baT jā.egī

merī nigāh-e-tishna-lab kī sarḳhushī na pūchhiye
ke jab uThī nigāh-e-nāz pī ga.ī pilā ga.ī

shahīd-e-nāz kī mayyat chale haiñ dafnāne
magar hai kūcha-e-jānāñ kahāñ nahīñ ma.alūm

un kī nigāh-e-nāz kī gardish ke saath saath
mahsūs ye huā ki zamāna badal gayā

vo shahr meñ thā to us ke liye auroñ se bhī milnā paḌtā thā
ab aise-vaise logoñ ke maiñ naaz uThā.ūñ kis ke liye

gar samand-e-nāz par tū ho savār
zulf kā hāthoñ meñ koḌā chāhiye

hai ḳhirāmāñ naaz se mauj-e-nasīm
nik.hat-e-gul kā ye ghoḌā chāhiye

na huī jalva-gah-e-nāz kī vus.at ma.alūm
go maiñ har zarra ko ik dīda-e-hairāñ samjhā

tāb-e-dīdār na laa.ī nigah-e-nāz-parast
aur vo dīda-e-ushshāq pe ehsāñ samjhā

tumheñ dariyā-e-ḳhūbī kah diyā ġharq-e-nadāmat huuñ
kahāñ ye nāz-o-ġhamza āriz-o-kākul samundar meñ

mānūs-e-iltifāt huā jā rahā huuñ maiñ
dekh ai nigāh-e-nāz miTā jā rahā huuñ maiñ