Tags-Naaz

tum jo kuchh chāho karo jaur-o-itāb-o-ḳhashm-o-nāz
kuchh nahīñ bantā hai āshiq se tahammul ke sivā

'nāz' tum par naaz kartī hai mohabbat kī qasam
zindagī bhar kī duāoñ kā asar lagte ho tum

nāznīñ nāz-āfrīñ nāzuk-badan nāzuk-mizāj
ġhuncha-lab rañgīñ-adā shakkar-dahāñ shīrīñ-suḳhan

kuchh is andāz se chheḌā nigāh-e-nāz-e-jānāñ ne
ki rah rah kar hamāre dil ke zaḳhmoñ ko hañsī aa.ī

jo havā se zulf bikhar ga.ī nazar un kī saaf badal ga.ī
jo asīr-e-halqa-e-nāz the vo qatīl-e-teġh-e-adā hue

naaz kabhī na kījiye apne urūj-e-hāl par
ba.ad-e-kamāl ai 'ziyā' aatā hai ik zavāl bhī

baiThā hai lau lagā.e koī teġh-e-nāz se
qātil kisī ke kaam meñ tāḳhīr ho na jaa.e

ġhurūr-o-nāz-o-takabbur ke din to kab ke ga.e
zahīr ab vo zamāne hasab-nasab ke ga.e

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

shor-o-ġhul meñ shahar ke us kī sadā bhī kho ga.ī
naaz thā jis ko ki apne nutq kī tāsīr par

mire dil meñ hijr ke baab haiñ tujhe ab talak vahī naaz hai
jo ye jī hī lene pe hai nazar to qubūl ho ye namāz hai

jaam ubal paḌte haiñ mai luTtī hai ḳhum TūTte haiñ
nigah-e-nāz kā dar-parda ishārā bhī to ho

tum harīm-e-nāz meñ baiThe ho begāne bane
justujū meñ ahl-e-dil phirte haiñ dīvāne bane

vo apne ḳhvāb ke hamrāh jā chukā hai naaz
akele apnī haqīqat meñ rah ga.e haiñ ham

husn meñ jab naaz shāmil ho gayā
ek paidā aur qātil ho gayā

do-ālam ko tah-o-bālā na kar de
badalnā naaz hai chitvan kisī kā

jaan detā huuñ magar aatī nahīñ
maut ko bhī nāz-e-ma.ashūqāna hai

'mus.hafī' us kī bazm meñ bhūke haiñ naaz ke jo log
gāliyoñ kī jagah unhoñ miltī haiñ kyā sahāliyāñ