Tags-Naaz

so rahī hai guloñ ke bistar par
ek tasvīr-e-rañg-o-nik.hat-o-nāz

ik zarra hī sahī magar ai āftāb-e-nāz
sajde karā rahe haiñ tirī har kiran se ham

ai mahv-e-nāz aur nayā koī imtihāñ
uktā ga.e haiñ bāzī-e-dār-o-rasan se ham

do din agar in āñkhoñ ne duniyā meñ mirī jaañ
kī nāz-o-adāoñ kī ishārāt to phir kyā

maiñ ne āvāz tumheñ dī hai baḌe naaz ke saath
tum bhī āvāz milā do mirī āvāz ke saath

jab use dekhā to jī chāhā ki dekhā hī karūñ
sochtā ye thā ki nāz-e-dilbarī kyā dekhnā

sāhil pe sarv-e-nāz ko de zahmat-e-ḳhirām
bal khā rahā hai ḳhaak pe dariyā tire liye

har baat meñ us kī garmī hai har naaz meñ us ke shoḳhī hai
qāmat hai qayāmat chaal parī chalne meñ phaḌak phir vaisī hī

husn-e-ḳhud-bīñ ko huā aur sivā nāz-e-hijāb
shauq jab had se baḌhā chashm-e-tamāshā.ī kā

jis ne jī bhar ke tajallī ko kabhī dekhā ho
koī aisā bhī tirī jalva-gah-e-nāz meñ hai

naaz uThā.ūñgā naaz uThāne tak
tere aage nahīñ bichh.uñgā maiñ

pas-e-umr bāzū-e-shauq par sar-e-nāz thā to huī ḳhabar
ka.ī rat-jage tire gesuoñ kī shikan shikan se chale ga.e

vo niyāz-o-nāz ke marhale nigah-o-suḳhan se chale ga.e
tire rañg-o-bū ke vo qāfile tire pairahan se chale ga.e

bahut ham ko thā tālib naaz jis par
vahī ab dil kisī kā ho gayā hai

qayāmat kī ḳhabar-gīrī hai
behad nāz-bardārī kā aalam hai

nigāh-e-nāz kā ik vaar kar ke chhoḌ diyā
dil-e-harīf ko bedār kar ke chhoḌ diyā

ilāhī de nigāh-e-lutf ḳhush-chashmoñ ko ik pal bhī
ki ham bīmār mar ga.e naaz uThāte in tabīboñ ke

hosh meñ lā ke mire hosh uḌāne vaale
ye tirā naaz hai shoḳhī hai adā hai kyā hai

kiyā thā ek din dil ne jo dāva-e-shakebā.ī
so ab tak un ke nāz-e-dilbarī ko ham se kāvish hai

aalam tamām us kā giraftār kyuuñ na ho
vo nāz-pesha ek hai ayyār kyuuñ na ho