Tags-Naaz

kis pe shab-ḳhūñ mārne kuuñ kī saf-ārā fauj-e-nāz
yak taraf syāhī misī kī surḳhī-e-pāñ yak taraf

'nadīm' apnī chāhatoñ pe naaz thā tumheñ bahut
to phir tumhāre ishq par zavāl kaise aa gayā

be-niyāz us husn ko aur naaz ko barpā rakhe
be-takalluf ho ke tū ai nāz-parvar ham se mil

mujh ko tanhā chhoḌne vaale tū na kahīñ tanhā rah jaa.e
jis par tujh ko naaz hai utnā us kā naam zamāna hai

naaz parastish ban jā.egā sabr zarā ai shorish-e-dil
ulfat kī dīvāna-garī se husn abhī begāna hai

kyā samajh kar ye naaz karte haiñ
amradoñ kā koī ġhulām nahīñ

thā chup rahnā hī behtar un kī bazm-e-nāz meñ 'ājiz'
koī ġham-āshnā hotā to sharh-e-dāstāñ karte

zabāñ ko band kiyā hai ye ġhāfiloñ ko hai naaz
zarā ragoñ meñ lahū kā bhī dekh leñ andāz

apne darāz-qad pe bahut naaz thā jinheñ
vo peḌ āñdhiyoñ meñ zamīñ se ukhaḌ ga.e

vo ajnabī ban ke ab mile bhī to kyā hai 'mohsin'
ye naaz kam hai ki maiñ bhī us kā kabhī rahā huuñ

jaur-e-a.adā kī taab kyā laatā
dil-e-kam-baḳht nāz-parvar thā

do-chār din meñ zālim hovegī ḳhat kī shiddat
ye husn aarzī hai is par na naaz karnā

maiñ farefta tere naaz par maiñ nisār tere niyāz par
tirī har adā meñ fareb thā mujhe jis kī be-ḳhabarī rahī

na rahā hayāt kī manziloñ meñ vo farq-e-nāz-o-niyāz bhī
ki jahāñ hai ishq barahna-pā vahīñ husn ḳhāk-basar bhī hai

vahī dard bhī hai davā bhī hai vahī maut bhī hai hayāt bhī
vahī ishq nāvak-e-nāz hai vahī ishq sīna-sipar bhī hai

jo patthar ko mom banā de dil meñ ab vo aañch kahāñ
jis sho.ale par naaz bahut thā vo sho.ala bhī ḳhaam huā

bādbāñ naaz se lahrā ke chalī bād-e-murād
kārvāñ iid manā qāfila-sālār aayā

ḳhush ho ai ishq ki phir husn huā mā.il-e-nāz
muzhda ai jins-e-mohabbat ki ḳharīdār aayā

soz se saaz hī nahīñ haal hai kuchh ajab tirā
maiñ to niyāz-mand huuñ naaz hai be-sabab tirā

rañg-e-shikasta sub.h-e-bahār-e-nazāra hai
ye vaqt hai shaguftan-e-gul-hā-e-nāz kā