Tags-Naaz

ye duniyā hai jo ḳhvāb-e-nāz 'ra.anā'
yahī ta.abīr-e-ḳhvāb-e-nāz bhī hai

aayā qarīb 'kaif' koī mast-e-nāz-e-husn
Daalī nazar ġhulām kiyā aur guzar gayā

tum kahāñ vo nigah-e-nāz kahāñ
apnī ḳhush-fahmiyoñ pe naaz karo

ka.ī phūloñ jaise log bhī haiñ inhī aise-vaise logoñ meñ
tū ġhairoñ ke mat naaz uThā tire chāhne vaale aur bhī haiñ

paas aane ko jo kahtā huuñ to 'muztar' naaz se
kahte haiñ chal duur itnī duur kī bāteñ na kar

ḳhadañg-e-nāz abhī hai tumhārī chuTkī meñ
na jaane log mujhe kyuuñ 'figār' kahte haiñ

zarūr Dhā.eñge aafat kuchh un ke nāvak-e-nāz
chaḌhe haiñ gosha-e-abrū kaḌī kamāñ kī tarah

nā-ḳhudā.ī pe hai naaz ahl-e-safīna hushiyār
nā-ḳhudā chāhtā hai aap ḳhudā ho jaanā

muntazir bazm hai aa jaa.eñ ba-sad ishva-e-nāz
shart ye hai ki nigāh-e-ġhalat-andāz na ho

us ne niyāz-o-nāz ke saare varaq ulaT diye
dast-e-ḳhalīl bhī diyā san.at-e-āzrī bhī dī

soz-e-darūñ atā kiyā jurat-e-āshiqī bhī dī
un kī nigāh-e-nāz ne ġham hī nahīñ ḳhushī bhī dī

falak ne us ko paalā thā baḌe nāz-o-ni.am se
sitāra jo tire ruḳhsār par rakkhā huā thā

is aan par nisār karūñ bazm-e-jām-e-jam
vo mast-e-nāz aaj mirā ham-piyāla hai

maiñ bint-e-havvā ik din meñ badal dūñgī zamāne ko
mujhe mat qaid kar nāz-o-adā kī dāstānoñ meñ

shakl-e-jānāna jā-ba-jā haiñ ham
kahīñ naaz aur kahīñ adā haiñ ham

kuchh ishārāt-e-nihāñ hoñ to nigāh-e-nāz ke
bhāñp leñge ham ye mahfil rashk-e-ḳhalvat bhī to ho

har sahar lag chalī to hai to nasīm
ai siyah-mast-nāz Tak hushiyār

merī nigāh-e-ḳhīra dikhāte haiñ ġhair ko
be-tāqatī pe sarzanish-e-nāz dekhnā

zahr-e-nasīhat tīr-e-malāmat dars-e-haqīqat sab ne diye
ek vahī thā jis ne merī har aadat par naaz kiyā

nashsha-e-ġhamza-o-andāz se sarshār huuñ maiñ
kāsa-e-umr-e-ravāñ jām-e-mai-e-nāz huā