Tags-Naaz

jab huā mahv-e-adā baaġh meñ vo ḳhusrav-e-husn
phūloñ ke aks se gulgūñ faras-e-nāz huā

nāzukoñ ke naaz uThāne ke bajā.e
nāzukoñ se naaz uThvātā huuñ maiñ

allāh allāh ye nāz-e-husn 'majāz'
intizār-e-salām hotā hai

qatīl-e-nāz batāte nahīñ tujhe qātil
jab un se pūchho ajal hī kā naam lete haiñ

hamāre haath se ai 'zauq' vaqt-e-mai-noshī
hazār naaz se vo ek jaam lete haiñ

naaz thā ham ko jin par unhīñ kī qasam vo bhī ulfat meñ nikle na sābit-qadam
be-kasī ke añdhere meñ ai shām-e-ġham ek ham rah ga.e ek tū rah ga.ī

beToñ ko thā alī kā ishāra ki baiTh jaao
lāzim nahīñ ki vaaz meñ naanā ko tum satāo

merī taḳhlīq huī jis kī tag-o-tāz ke saath
vahī zarra mujhe taktā hai baḌe naaz ke saath

mujh ko hai naaz ki kuchh to huuñ maiñ
'jyotī' qatra hai to qatra hī sahī

merī ummīdoñ kī duniyā hil ga.ī
naaz se dāman bachā kar chal diye

kyā maiñ koī bachchī huuñ kahtī hai maiñ achchhī huuñ
naaz uThātī rahtī hai bārish kuchh kuchh kahtī hai

naaz karūñ yā faḳhr karūñ maiñ sab kuchh hai lāzim mujh ko
rafta rafta dil meñ us kā maskan hone vaalā hai

majāl-e-dīd kī mohlat na deñ lekin ye kyā kam hai
vo ham ko apnī bazm-e-nāz ke qābil samajhte haiñ

be-niyāzī kare jo tū hī to phir
ai hama-nāz kaun hai apnā

jo us ke husn kī parchhā.iyāñ na aa.eñ nazar
to ruuh garm-e-tavāf-e-harīm-e-nāz na ho

yahī hai raunaq-e-garmī yahī hai raunaq-e-bazm
nigāh-e-nāz tire zauq-e-intiḳhāb kī aañch

adā se naaz se chalnā qayāmat un kā thā
jo mal ke dil ko kaleje masal masal ke chale