Tags-Naaz

vo maiñ huuñ aaj zamāne ko naaz hai jis par
'riyāz' dhuum hai jis kī vo hai zabāñ merī

tasvīr hai khiñchī huī nāz-o-niyāz kī
maiñ sar jhukā.e aur vo ḳhanjar liye hue

takiya karam pe kaise karūñ maiñ ki nāz-e-husn
nukta-navāz hai to sahī nukta-chīñ bhī hai

tum nañg jaan kar ise chāho to bhuul jaao
ham ko to ab bhī apnī mohabbat pe naaz hai

lage yuuñ to hazāroñ hī tīr-e-sitam ki taḌapte rahe paḌe ḳhaak pe ham
vale naaz o karishma kī teġh-e-do-dam lagī aisī ki tasma lagā na rahā

vafā par naaz ham ko un ko apnī bevafā.ī par
koī muñh aa.ine meñ dekhtā hai koī paanī meñ

un ko taklīf-e-nāz detā huuñ
haa.e ye ḳhū-e-dost-āzārī

merī ye bechainiyāñ aur un kā kahnā naaz se
hañs ke tum se bol to lete haiñ aur ham kyā kareñ

ba-sa.i-e-ġhair hai qat-e-libās-e-ḳhāna-vīrānī
ki nāz-e-jāda-e-rah rishta-e-dāmān-e-sahrā hai

taġhāful-mashrabī se nā-tamāmī bas-ki paidā hai
nigāh-e-nāz chashm-e-yār meñ zunnār-e-mīnā hai

hijāb-e-nāz be-jā 'yās' jis din beach meñ aayā
usī din se laḌā.ī Than ga.ī shaiḳh-o-barahman meñ

aañkh meñ gar na aa sake dil to maqām hai tirā
ḳhalvat-e-dil meñ aa kabhī apne harīm-e-nāz se

mujh par surūr chhā gayā bāda-e-dil-navāz se
duniyā mirī badal ga.ī ek nigāh-e-nāz se

ḳhudā ne rakh liyā naaz o niyāz kā parda
ki roz-e-hashr mirī un kī barmalā na huī

shahr vāloñ ne inheñ abr-e-karam samjhā naaz
apne aañsū jo havāoñ meñ uchhāle maiñ ne

in rātoñ ko harīm-e-nāz kā ik aalam hue hai nadīm
ḳhalvat meñ vo narm uñgliyāñ band-e-qabā jab kholeñ haiñ

vo sab arbāb-e-jazb-o-shauq jin par naaz thā ham ko
hue haiñ hosh-mandī ke shikār āhista āhista

dushman ke ghar se chal ke dikhā do judā judā
ye bāñkpan kī chaal ye nāz-o-adā kī hai

use dekhne kī thī aarzū mujhe us kī thī baḌī justujū
magar us ke āriz-e-nāz pe mirī har nigāh phisal ga.ī

ḳhudā jaane harīm-e-nāz hai kitnī bulandī par
ki guzrīñ muddateñ lekin hai naala nā-rasā merā