Tags-Naaz

un kī nazar ke saath hī saarā zamāna phir gayā
gardish-e-chashm-e-nāz hai gardish-e-rozgār kyā

uTh ga.ī jis taraf nazar hashr sā ik bapā huā
un kī nigāh-e-nāz hai fitna-e-rozgār kyā

ek baar aur bhī kyuuñ arz-e-tamannā na karūñ
ki tū inkār bhī kartā hai ajab naaz ke saath

naaz kī jalvagarī ke liye manzar hai niyāz
nā-tavānī mirī ham-rañg-e-tavānā.ī hai

kuchh ajab thā terī bazm-e-nāz meñ 'aḳhgar' kā haal
aaj us ko der tak kuchh sochtā dekhā gayā

chehra-e-mohabbat par hai usī se tābānī
ye ġhubār pā-e-nāz ġhāza-e-vafā sā hai

naaz hai apnī bandagī pe 'hasan'
jis ko chāheñ vahī ḳhudā hogā

ek nāz-e-be-takalluf mere tere darmiyāñ
dūriyāñ saarī miTā diiñ fāsla rahne diyā

merī jānib hai muḳhātib ḳhaas kar vo chashm-e-nāz
ab to karnī hī paḌegī dil kī qurbānī mujhe

kyā nadāmat huī hai qātil se
nāz-e-ḳhanjar gulū uThā na sakā

is qadar zo.af thā ki terā naaz
thī tamannā magar uThā na sakā

bin hamāre na tire naaz uThā.egā koī
soch le chhoḌ ke ham aise parastār na jā

nīlām jo karte haiñ yahāñ jins-e-vafā ko
mumkin hī nahīñ nāz-e-ḳharīdār uThā.eñ

mil ga.e par hijāb baaqī hai
fikr-e-nāz-o-itāb baaqī hai

bahut kuchh chhupāyā bahut kuchh bachāyā magar pesh-bañdī na kuchh kaam aa.ī
kiye ḳhanjar-e-nāz ne chaar TukḌe bil-āḳhir huā dil mohabbat meñ chaupaT

rabt hai nāz-e-butāñ ko to mirī jaan ke saath
jī hai vābasta mirā un kī har ik aan ke saath

ab nahīñ dil ko kisī sūrat kisī pahlū qarār
us nigāh-e-nāz ne kyā sehr aisā kar diyā

ham rahe yaañ tak tirī ḳhidmat meñ sargarm-e-niyāz
tujh ko āḳhir āshnā-e-nāz-e-bejā kar diyā

sham-e-umīd jis meñ farozāñ na ho sakī
ab us kī bazm-e-nāz meñ vo raat le chaleñ