Tags-Naqab

ajab hai aalam ajab hai manzar ki sakta meñ hai ye chashm-e-hairat
naqāb ulaT kar vo aa ga.e haiñ to aa.ine gungunā rahe haiñ

mire miTāne kī tadbīr thī hijāb na thā
vagarna kaun se din husn be-naqāb na thā

naqāb tābish-e-jalva se aab aab huā
ki jaise dhuup meñ koī kinār-e-jū nikle

uThī huī hai jo rañgīnī-e-taġhazzul par
vo har naqāb girāne kī baat kartā huuñ

merī āñkheñ hai muntazir ab bhī
kab vo chehra naqāb se nikle

guzar gayā koī pahchāntā huā mujh ko
purānī yādoñ kī sham.eñ pas-e-naqāb liye

ab apnī nigāh darmiyāñ hai
dekhā tujhe be-naqāb ham ne

'firāq' vaqt ke ruḳh se ulaT rahī hai naqāb
zamīñ se tā-ba-falak hai is inqalāb kī aañch

diloñ kā soz tire rū-e-be-naqāb kī aañch
tamām garmī-e-mahfil tire shabāb kī aañch

chhupā liyā hai maiñ ne saarā dard apnī ruuh meñ
tasalliyoñ kā zāhirī naqāb koī le gayā

muñh chhupāo na tum naqāb meñ jaan
yūñhī āshiq kī hai azaab meñ jaan

ġhunchoñ ko e'tibār-e-tulū-e-chaman nahīñ
ruḳh se ulaT naqāb ki mausam ḳharāb hai

aap hī pahle uThā dī rū-e-raushan se naqāb
aap hī phir pūchhte haiñ chāñd ko kyā ho gayā

kasrtat-e-dīdār se un kī nigāheñ jhuk ga.iiñ
aks mizhgāñ kā naqāb-e-rū-e-zebā ho gayā

tum sar-e-ām ek din 'hāmid'
ruuh ko be-naqāb kar lenā

be-chehragī aziiz magar ḳhāl-o-ḳhad kā ġham
dāġh-e-jigar naqāb ke pīchhe nahīñ gayā

naqāb chehre pe bāteñ luāb-dār kare
vo rahnumā hai siyāsat kā kārobār kare

aa.e ho to ye hijāb kyā hai
muñh khol do naqāb kyā hai

mire liye haiñ musībat ye ā.ina-ḳhāne
yahāñ zamīr mirā be-naqāb rahtā hai

duniyā tujhe maiñ dekhūñ to kin āñkhoñ se dekhūñ
ik shaḳhs ke chehre se naqāb utre haiñ kitne