Tags-Naqab

mausam-e-gul thā ki thī barq-e-ḳhizāñ zer-e-naqāb
phuul hañsne bhī na paa.e the gulistāñ jal gayā

tā ye shab-e-firāq kī dījūr duur ho
ai rashk-e-māh ghar meñ mire be-naqāb aa

hameñ is kā koī bhī haq nahīñ ki sharīk-e-bazm-e-ḳhulūs hoñ
na hamāre paas naqāb hai na kuchh āstīñ meñ chhupā huā

garebāñ bahut se hue paara paara
naqāb ek bhī paara paarā nahīñ hai

har ek samt yaqīñ kī naqāb oḌhe hue
har ek paikar-e-vahm-o-gumāñ dikhā.ī diyā

sahar lā.egī kyā paiġhām-e-bedārī shabistāñ meñ
naqāb-e-ruḳh ulaT do ḳhud sahar bedār ho jaa.e

dekh chhuptā hai abr meñ ḳhurshīd
duur kar duur kar naqāb naqāb

naqāb-e-husn jab uTThā to āñkheñ khul ga.iiñ merī
faroġh-e-husn thā dam-bhar ko mānind-e-sharar merā

dānista naqāb ulTe hue haiñ sar-e-bāzār
aur us pe ye kahte haiñ ki ḳhilqat ko huā kyā

mujhe butoñ se ijāzat agar kabhī mil jaa.e
to shahar-bhar ke ḳhudāoñ ko be-naqāb karūñ

shāyad ruḳh-e-hayāt se sarke naqāb aur
bhar do mire subū meñ sharāb-e-gulāb aur

chāñd ġhairat se chhup gayā kal bhī
chhat pe phir be-naqāb thā koī

butoñ se parda uThāne kī bahas hai bekār
khulī dalīl hai kaaba bhī be-naqāb nahīñ

bahār detā hai chhan chhan ke nuur chehre kā
sar-e-naqāb hai jo kuchh tah-e-naqāb nahīñ

hameñ to duur se āñkheñ dikhā.ī jaatī haiñ
naqāb lipTī hai us par koī itaab nahīñ

mohabbat jaag uTThī rag rag meñ armānoñ ko niiñd aa.ī
haqīqat ne naqāb ulTī to afsānoñ ko niiñd aa.ī

vo nikle hoñge jab sahn-e-chaman meñ be-naqāb ho kar
nazar āḳhir nazar hai be-irāda uTh ga.ī hogī

go sarāpā hijāb haiñ phir bhī
tere ruḳh kī naqāb haiñ ham log

naqāb uThāo to qissa hī ḳhatm ho jaa.e
tumhāre parda ne fitne uThā.e haiñ kyā kyā